Wasiirka Kalluumeysiga iyo Kheyraadka Badda Soomaaliya Mudane Maxamed Cumar Ceymooy ayaa sheegay in kalluumeysatada Soomaaliyeed ay dhibaato ka haysato helitaanka agabkii ay ku qaboojin lahaayeen marka ay kalluunka badda kala soo baxaan, isagoo baaq u diray ganacsatada Soomaaliyeed in arrimahaasi laga caawiyo kalluumeysatada.
Wasiirka Kalluumeysiga oo ka hadlayay siminaar shalay Muqdisho loogu soo xiray haween ka ganacsada kalluunka ayaa sheegay in kalluumeysatada Soomaaliyeed aysan haysanin agabyo ku filan oo ay kaga faa’iideysan karaan kheyraadka badda ku jira, loona baahanyahay in gacan lagu siiyo sidii ay u heli lahaayeen qaboojiyeyaal ay ku keydsan karaan kalluunka.
“Saq dhexe qofkii badda u galay in uu kalluun soo helo, kalluunkii aad badda kala soo baxday oo dhacdo in lagaa gadan waayo, isla markaana aan heysanin meel lagu qaboojiyo waxa ay niyad jebineysaa kalluumeysatada, marka waan in aan u helnaa qaboojiye, oo aan isku tashano, isla markaana aan ku dadaalno sidii kalluunka badda laga soo saaro loogu heli lahaa qaboojiyeyaal lagu keydin karo” ayuu yiri Wasiir Ceymooy.
Arrintan ayaa dhiiri gelin u noqoneysa kalluumeysatada Soomaaliyeed oo dhibaatooyin ku qaba helidda agabyo ay ku keydsan karaan kalluunkooda, marka ay badda kala soo baxaan.
