Wafuud ay kala hoggaaminayaan madaxweynayaasha dawlad-goboleedyada Jubbaland Axmed islaan Axmed madoobe iyo Koofur-Galbeed Shariif Xasan Shiikh Aadan ayaa maanta lagu soo dhaweeyey magaalada Garoowe, ayagoo ka qeyb galaya shir dowladda dhexe iyo dowlad-goboleedyada uga furmaya magaalada Garowe.
Masuuliyiinta ayaa socod ku maray qeybo ka mid ah magaalada ayagoo salaamayey dadweyne ka qeyb qaadanayay soo dhaweynta wafuuddan.
Madaxweynaha Dawlad-Goboleedka Puntland Cabdiweli Maxamed Cali Gaas oo soo dhaweynta masuuliyiintan ka hadlay ayaa sheegay in dhammaan wafuudda ku sugan magaalada Garoowe ay ka wada qeyb geli doonnaan shirka wada tashiga Soomaaliya oo ah shir muhiim u ah waddanka.
“Waxaa maanta sharaf weyn noo ah inaan soo dhaweeyo madaxweyneyaasha dawlad-goboleedyada Koonfur-Galbeed Shariif Sasan Shiikh Aadan iyo madaxweynaha Jubbaland Axmed Islaan Axmed Madoobe oo u yimid inay ka qeyb qaataan shirka wada-tashiga Soomaaliya iyo dawladnimada Soomaaliyeed. Ajadayaal badan ayaa shirkaas looga wada hadli doonaa shirkaas, shalay waxaa noo yimid madaxweynaha Dawladda Federaalka Soomaaliya, ujeeddaduna waxa weeye in la isku yimaado oo laga wada hadlo arrimo muhiim u ah Soomaaliya” ayuu yiri Dr. Cabdiwali Gaas.
Madaxweynaha Dawlad-goboleedka Koonfur-Galbeed Shariif Xasan Shiikh Aadan ayaa ugu horeyn ka mahad celiyey soo dhaweynta isagoo shirka Garoowe ka rajeeyay mid is bedel wanaagsan u horseeda Soomaaliya. “waxaan rajaynaynaa in madaxda isku timid ay noqdaan kuwo taariikhda Soomaaliya wax ka beddela, dhibaatada jirtana wax ka bedela, Soomaalina gaarsiiya midnimo iyo wada-socod iyo walaalnimo iyo dawladnimo” Ayuu yiri Shariif Xasan Sheekh Aadan.
Madaxweynaha Dawlad-goboleedka jubbaland Axmerd islaan Axmed Madoobe ayaa isna dhankiisa sheegay inuu ku faraxsan yahay imaantinkiisa Puntland.
“Imaantinkeenna halkaan wuxuu noqon doonaa mid natiijo guul iyo mira dhal ah laga gaaro,wax badan ayaa Soomaalidu arrimiheeda banaanno iyo meelo kale ku soo dhameysatay, waxa laga hadlayo hadday tahay hogaamiyeyaasha Soomaalidu ha isku yimaadaan oo iyagu gudahooda haku tashadeen iyadoon cidi ku dhaxjirin wixii masiirka umadda Soomaaliyeed ah hallaga tashado, waxay ila tahay mar dhaw waxaan gaari doonna sidaan si ka beddelan oo wanaagsan” ayuu yiri madaxweynaha Jubbaland.
Madaxweynaha dowladda Federaalka ah ee Soomaaliya mudane Xasan Sheekh Maxamuud iyo wafdi uu hoggaaminayo ayaa ku sugan magaalada oo dhawaan uu ka furmi doono shir u dhaxeeya dowladda Dhexe iyo madaxda dowlad-goboleedyada dalka ka jira. Shirkaas ayaa looga hadlayaa arrimo ku saabsan xaaladda siyaasadeed ee waddanka iyo hiigsiga 2016-ka.
