Kulankan oo ahaa kulan Sadex geesood ah oo dhex maray dowlada soomaaliya Hay’adaha caalamig ah iyo wadamada deeq bixiyaasha ayaa maanta lagu qabtay magaalada Nairobi, waxaana shirkan looga hadlayey arrimaha Hiigsiga cusub ee soomaaliya,dhinaca dowladda soomaaliya ayaa waxaa uga qeyb galay mas’uuliyiin ay ka mid ahaayeen Ra’iisul wasaare ku xigeenka xukuumada soomaaliya mudane Maxamed Cumar Carte, wasiirada waxbarashada Marwo Khadar Bashiir Cali, Wasiirka Amniga gudaha Mudane Cabdirisaaq Cumar Maxamed, Wasiirka Maaliyada Maxamed Aadan Ibraahim Cabdulahi Sheekh Cali “Qaloocow” wasiir ku-xigeenka Wasaaradda Qorsheynta iyo Iskaashiga caalamiga iyo xubno kale oo ka tirsaln labada gole ee xukuumada soomaaliya .
dhanka kale waxaa kulankan goob joog ka ahaa safiiro ka socday wadamada deeeqaha bixiya iyo hay’adaha qaramada midoobay,waxaana laga wada hadlay sidii loo dardar galin lahaa dhameystirka hiigsiga cusub iyo wada shaqeynta ka dhaxeysa dhinacyada kala duwan ee kulankan ka soo qayb galay.
markii uu soo dhamaaday kulankan ayaa warbaahinta qaranka waxa ay weydiisay ahmiyadda uu u lahaa dowladda soomaaliya Ra’iisul wasaare ku xigeenka xukuumada Soomaaliya mudane Maxamed Cumar Carte .
“ Ahmiyada uu u leeyahay waxaa weeyaan dardar galinta shaqooyin iyo dardar galinta sidii deeq bixiyaasha iyo hay’aduhu u dardar galin lahaayeen shaqooyinka ay ka hayaan soomaaliya,laakiin badanaa shirka noocan oo kale ah waxaa lagu qaban jiray magaalada muqdisho kan maaha kii CRDF ta ahaa, kaasi wuxuu u baahan yahay in ay kasoo qeyb galaan gobolada iyo dad intaas ka badan laakiin muhiimadda uu leeyahay waaa sidii hawlihii socday loo dardar galin lahaa “. Ayuu yiri Ra’iisul wasaare ku xigeenka Cumar Carte.
Dhanka kale Ra’iisul wasaare ku xigeenka iyo waaftiga uu hogaaminayo ayaa la filayaa in ay maalmaha soo socda u anbabaxaan magaalada Jineefa ee dalka Swisserland, iyagoo halkaasi kaga qeyb gali doona shirka ururka shaqaalaha aduunka ee ILO .
Cabdiraxmaan Soomaali
Warbaahinta Qaranka
Nairobi – Kenya.
