Madaxwaynaha dowlad goboleedka Galmudug Cabdikariin Xuseen Guuleed iyo wafdi uu hogaaminayo oo maalintii labaad socdaal shaqo ku jooga magaalada Gaalkacyo ee xarunta gobolka Mudug ayaa saaka kormeeray xarumaha danta guud ee magaalada.
Mudane Cabdikariin Guuleed ayaa kormeerkiisa ka bilaabay dhismaha wadada xiriirisa Gaalkacyo iyo Hobyo, waxaana uu sheegay in ka maamul ahaan ay ku tabarucayaan $50,000 (Konton kun oo Dollar), taas oo hordhac u ah mashaariicda dhismaha wadooyinka.
Sidoo kale wafdiga madaxwaynaha dowlad goboleedka Galmudug ayaa kormeeray Isbitalka iyo Jaamacadda Gaalkacyo, halkaas oo hawladeenadooda uu warbixino kaga dhagaystay, iyadoo wafdiga uu hogaaminayay ay qayb ka ahaayeen Xildhibaanno ka torsan Baarlamanka Galmudug, Odayaal iyo siyaasiyiin xilalal ka soo qabtay gobolka, kuwaasi tagay garoonka cayaaraha ee Cabdullahi Ciise Maxamuud, halkas oo kumanaan shacabka reer Gaalkacyo ah ay isugu soo baxeen.
Bile Diini Cali Guddoomiyaha degmada Gaalkacyo ayaa sheegay in ay ku faraxsanyihiin wafdiga uu hogaaminayo madaxwaynaha Galmudug in Gaalakcyo ay ka mid noqoto meelaha ugu horeeya ee ay booqashada ku yimaadeen.
Maxamed Sheekh Axmed Maalin Guddoomiye ku-xigeenka Labaad Baarlamanka Galmudug oo isna halkaas ka hadlay ayaa ugu baaqay shacabka reer Galmudug inay la shaqeeyaan maamulkooda cusub.
Mudane Cabdikariin Xuseen Guuleed oo khudbad u jeediyay dadwaynaha reer Gaalkacyo ee fagaarahaas isugu soo baxay ayaa ka hadlay arrimo dhawr ah, sida amniga deegaanka, adeegga bulshada iyo dhaqaalaha, waxa uu sheegay in marka ugu horaysa ee dhismaha mamaulka la dhamaystiro xoogga la saarayo sidii Dekad loo samayn lahaa, taas oo fure u noqonaysa horumarka dhaqaalaha deegaanada Galmudug.
Wafdiga oo wali ku sugan magaalada Gaalkacyo ee xarunta gobolka Mudug ayaa wadatashi la yeelanaya qaybaha bulshada.
W/Q: Maxamuud Cabdi Diirshe
