Related posts
Mashruucan oo degmada Cadaado looga hirgalinayay Layrarka ku shaqeeya Ilayska qoraxda oo dhawrkii bilood ee la soo dhaafay soo socday ayaa xalay waxaa xariga ka jaray madaxwayne ku xigeenka dawlad goboleedka Galmudug Maxamed Xaashi Cabdi oo ay wehliyaan maamulka degmada iyo mas’uuliyiin kale.
Gudoomiyaha degmada Cadaado C/llahi C/raxmaan Tootoole ayaa sheegay in mashruucan uu degmada hormarkeeda ganacsi iyo nabadgalyaba ka qayb qaatay.
“Waxaa nagu caawisay dawlad Ingiriiska ayaa dhaqaalaha ku baxay bixisay, degmada Cadaado ayaana fulisay, ย aad iyo aad ayaa looga faa’iideystay waxa ay ku soo aadeen xilligii shirka, aad iyo aad ayay bilicda iyo amnigaba uga qayb qaadatay, caawa anaga ayuu nagu wareegay guud ahaan dadka Galmudug gaar ahaan dadka Cadaado, inay ilaashadaan ayaa laga rabaa, dayactirkooda dad ayaan u tababarnay oo jooga qalabkii dayactirkana waan haynaa” ayuu yiri Tootoole.
Madaxwayne ku xigeenka Galmudug Maxamed Xaashi Cabdi ayaa u mahadceliyay dhamaan dhinacyadii ka qayb qaatay hirgalinta mashruucan, isagoo sheegay in wali Cadaado iyo degmooyinka kale ee Galmudug ay u baahanyihiin Layrarkan cadceeda ku shaqeeya.
“Waxaa farxad leh in degmada Cadaado oo ka tirsan dawlad goboleedka Galmudug inay nasiib u heshay Layrarkan, laakin wali waxaan arkaynaa maadaama halkan xarunta dawladu ku shaqayso in nalalkan aysan ahayn kuwo ku filan, waxaan codanaynaa ilaa 100 kale in loogu soo daro, waxaa farxad ii ah inaan qayb ka ahaado furitaanka mashruucan” ayuu yiri Maxamed Xaashi.
Mashruucan Layrarka qoraxda ku shaqeeya ayaa ka mid ah mashraaciida hormarineed ee sanadkan ka hirgalay degmada Cadaado ee gobolka Galgaduud.
Sawir-qaade Maxamuud Cabdi Diirshe
