Taliye ku-xigeenka ciidanka booliska Soomaaliyeed Jeneraal Mukhtaar Xuseen Afrax iyo wafdi uu hogaaminayo ayaa maanta si diiran loogu soo dhaweeyay magaalada Beladweyne ee xarunta Gobolka Hiiraan, kaddib markii uu socdaal shaqo ku tegay halkaasi.
Maamulka gobolka iyo qeybaha bulshada ayaa ka qeyb qaatay soo dhaweynta Taliye ku-xigeenka ciidanka booliksa, waxaana markii uu ka soo degay garoonka Ugaas Khaliif uu salaam sharaf ka qaatay cutubyo ka tirsan ciidanka booliska, isagoo soo kormeeray saldhiga booliska ee degmada iyo goobo kale.
Taliye ku-xigeenka ciidanka booliska Soomaaliyeed Jeneraal Mukhtaar Xuseen Afrax oo la hadlay Warbaahinta ayaa sheegay in u jeedka socdaalkisa ay tahay sidii uu ugu kuur geli lahaa guud ahaan xaaladda amni iyo tan nololeed ee ka jirta Beladweyne.
“Ujeedka socdaalkeyga waxa uu ku saabsanyahay in aan u kuur galno guud ahan nabad gelyada iyo xaaladda ciidanka jooga halkan ay ku suganyihiin, waxaana kulamo la qaadan doonaa maamulka gobolka, kan degmada, odoyaasha dhaqanka, ciidanka iyo qeybaha kale ee bulshada” ayuu yiri Sareeyo Guuto Mukhtaar Xuseen Afrax.
Guddoomiyaha Gobolka Hiiraan Cabdifataax Xasan Afrax oo isna goobta hadal kooban ka jeediyay ayaa sheegay in wafdigu ay qiimeyn ku sameyn doonaan xaaladda amni ee degmada iyo guud ahaan gobolka, waxaana uu intaa ku daray inay diyaar u yihiin la shaqeynta wafdiga.
