Waxaa dhaqdhaqaag xaga ganacsiga ah laga dareemayaa gudaha degmada Xudur ee xarunta gobolka Bakool tan iyo markii ciidamada qalabka sida ee Soomaaliya ay ku guuleysteen in ay furaan qaar ka tirsan waddooyinka soo gala magaalada, kuwaas oo horey jidgooyooyin ugu sameeyey kooxda Al-Shabaab, taasi oo wax ka bedeshey nolashii caadiga aheyd ee bulshada reer Xudur.
Ganacsatada magaalada Xudur waxay bilaabeen in ay raashinka ay si toos ah ugu soo rartaan magaalooyin ay ka mid yihiin Muqdisho, Beladweyne ilaa Boosaaso kuwaasi oo soo gaarayaa gudaha degmada xuddur, iyadoo gawaari fara badan oo raashiin sida ay sitoos ah u isticmaalayaan wadada isku xirta Ceelberde iyo Xudur, qaar ka tirsan gawaaridani raashiinka sida waxay u sii gudbaan deegaano dhowr ah sida deegaan Mooragaabey, Garasweyne, Buurdhuxunle iyo deegaanno kale oo hoosyimaada degmooyinka gobolka bakool.
Shacabka ku dhaqan deegaanadani ayaa aad u soo dhoweeyey, kuna tilmaamey talaabadani mid wax ka bedeshey xaaladihii adkaa ee ka jirey deegaanadani, iyagoo mahad balaarana u jeediyey ciidamada xoogga dalka Soomaaliyeed sida geesinimada leh oo naftooda ugu hureyn sugidda ammaanka wadooyinka soo gala qaar ka tirsan degmooyinka gobolka Bakool.
Maxamed Xasan Cabdiraxmaan Bakool
