Wasiir ku-xigeenka Wasaaradda beeraha ee Xukuumadda Soomaaliya ayaa maanta deeq isug jirta raashin iyo makiinadda lagu shiido raashinka gaarsiiyay qaxootiga Yemen ee degan dhismaha Safaaradda Yemen ay ku leedahay dalka, isagoo ku wareejiyay danjiraha Yemen ee Soomaaliya Danjire Maxamed Shaa’id.
Wasiir ku-xigeenka oo uu wehliyo Safiirka ayaa waxa uu ku soo wareegay oo uu soo indha indheeyay kaamka, isagoo la kulmay carruur xanuunsan oo uu amray in la geeyo isbitaalka, waxaana sidoo kale uu sheegay in uu ku arkay halkaa xaalad murugo leh dhibaato badana ay haysato qaxootigaas.
Hooyo ka mid ah qaxootiga reer Yemen ayaa tiri “Qabowga iyo qoraxda ayaa nagu dhacaya ma haysano wax aan ku noolaano carruurta caano aan siino ma hayno, raashin aan karsano ma haysano, caafimaad ma jiro, waxbarasho ma jirto, biyo macaan malahan, waa dhibanahay dowladda Soomaaliya hana caawiso”
Safiirka dowladda Yemen ee Soomaaliya Danjire Maxamed Shaa’if Cismaan oo ka hadlay deeqda uu Wasiirku gaarsiiyay qaxootiga ayaa sheegay in aysan ahayn mid ku filan, loona baahan yahay in si dhab ah loogu soo gurmado qaxootigaaas, waxaa kale oo uu dowladda Soomaaliya waydiistay in qaxootiga laga raro safaarada oo goob kale la dajiyo.
Wasiir ku xigeenka Wasaaradda Beeraha ee Xukuumadda Soomaaliya mudane Cabdicasiis Saalax Cismaan oo gaba gabadii ka hadlay halkaa ayaa sheegay in dowladda Soomaaliya ay dadaal dheer ugu jirto in la caawiyo qaxootiga Yemen oo xaalad adag ku nool, waxaana uu sidaas oo kale ka codsaday bulshada in gacan la geysto caawinta dadkaas.
