Madaxweynaha Galmudug Mudane Cabdikariim Xuseen Guuleed ayaa tacsi u direy qoyskii, eheladii iyo Shacabka reer Hiiraan geeridii ku timid Ugaas Cabdiraxmaan Ugaas Khaliif Ugaas Rooble oo maanta ku geeriyooday magaalada Beledweyne ee xarunta gobalka Hiiraan.
“Anigoo ku hadlaya magaceyga, magaca dowlad goboleedka Galmudug iyo Shacabka Galmudug waxaan tacsi u dirayaa Ehaladii, Qaraabadii, Shacabka reer Hiiraan iyo guud ahaan Ummada Soomaaliyeed, geeridii maanta ku timid Ugaas Cabdiraxmaan Ugaas Khaliif Ugaas Rooble, waxuu Ugaaska ahaa shaqsi waqtigiisa ugu badan galiyay nabadeynta iyo dib u heshiisiinta ummadda, waxa uuna saaka geeriyooday isaga oo ka qeybgalaya shirka Nabadda ee Samadoon, waxaana lagu xusuusan doonaa Ugaaska hawlihii muhiimka ahaa ee uu u hayey bulshada sida nabadeynta iyo dib u heshiisiinta oo uu wadey ilaa ay geerida uga timaaddo” ayuu yiri Madaxweynaha dowlad goboleedka Galmudug Mudane Cabdikariim Xuseen Guuleed.
Madaxweynaha dowlad goboleedka Galmudug ayaa Ilaah ugu baryay inuu Marxuum Ugaas Cabdiraxmaan Ugaas Khaliif naxariistiisa Jannatul Fardowsa ka waraabiyo, qoyskii, eheladii iyo shacabka Soomaaliyeed ee uu ka geeriyoodayna uu samir iyo iimaan ka siiyo.
