Cutubyo ka tirsan ciidanka XDS iyo kuwa AMISOM oo wata gaadiidka gaashaaman ee dagaalka ayaa saaka si buuxda ula wareegay gacan ku heynta deegaanka Biya Cadde oo ka tirsan degmada Jowhar ee gobolka Sh/Dhexe.
Malleeshiyaadki Shabaab ee halkaasi ku sugnaa ayaa isaga cararay deegaankaasi kaddib markii ay ciidamadu halkaasi u ruuqaansadeen, iyadoo ciidamadu ay si nabadgelyo ah ula wareegeen deegaanka Biyo Cadde oo 45 kilo mitir dhanka waqooyi bari uga beegan degmada Jowhar, halka degmada Mahadaayna ay 28 kilo mitir uga toosantahay jihada bari.
Ciidamada ayaa halkaasi ka wada baaritaanno ay ku xaqiijiyaan ammaanka deegaankaasi, iyagoo bariisimo ka sameystay duleeddada tuuladaasi.
Dadweyne farabadan oo ku dhaqan deegaankaasi ayaa isugu soo baxay waddooyinka magaaladaasi, iyagoo muujinayay faraxad, islamarkaana ciidamada ugu hambalyeeynayay cadowga ay ka dulqaadeen kaasoo ay sheegeen in uu dhibaatooyin ba’an ku hayay.
Mas’uuliyiin ka tirsan maamulka gobolkaShabeelaha Dhexe ayaa ku sii wajahan halkaasi si ay u kormeeraan xaaladda deegaanka iyo baahiyaha ay qabaan bulshada ku nool halkaasi.
Talaabadan ayaa qeyb ka ah howlgallada ciidamada XDS iyo kuwa AMISOM ay dalka kaga xoreeynayaan haraadiga maleeshiyaadka Shabaab oo weli ku dhuumaaleysanaya deegaanno kooban oo ka tirsan dalka.
