Dowladda Ethiopia ayaa sheegtay in koox hubeysan ay 140 qof ku dileen dhanka galbeed ee dalkaasi, ugu yaraan 39 caruurana ay afduubteen.
Wasiirka Isgaarsiinta Ethiopia Getachew Reda ayaa sheegay in kooxda wax weerartay ay ka yimaadeen dalka deriska la ah ee South Sudan.
Dadka la weeraray ayaa ka soo jeeda qowmiyadda Gambela, oo mararbadan weeraro looga soo qaaday dhanka South Sudan.
Dableyda weerarka gaysatay ayaa waxa ay kasoo jeedaan qowmiyadda Murle, dowladda Ethiopiana waxa ay sheegtay in 60 qof laga dilay.
Wasiirka ayaa BBC-da u sheegay in loo maleynaayo in dableyda aysan wax xirir la lahayn dowladda ama mucaaradka South Sudan, isagoo intaasi ku daray in mileteriga Ethiopia weli ay baacsanayaan maleeshiyada weerarka qaaday.
Qowmiyadda Murle ayaa aalaaba lagu eedeeyaa iney qaadaan weerarro lo’ dhicid ah, iyo qafaalashada caruurta.
Wasiirka Isgaarsiinta Ethiopia Getachew Reda ayaa sheegaya in arrintan ay tahay wax iska caadi ah oo xuduudda labada dal marar badan ka dhacday.
