Ururka SAAD oo ah urur dhalliyaro ah, una adeega bulshada ayaa maanta booqasho ku tegay Dugsiga hoose iyo dhexe ee Warjiroow oo hoos taga degmada Balcad ee gobolka Shabeelaha Dhexe, kaasi oo ay gacanta ku hayaan ururka SAAD.
Mas’uuliyiinta ururka SAAD ayaa kulan la qaatay maamulka Dugsiga iyagoo warbixin la xiriirka xaaladda iskuulka ka dhageystay Cismaan Xasan Jurri oo ah mamulka dugsiga, waxaana uu ka sheekeeyay heerarka waxbarasho ee carruurta iskuulka dhigato iyo baahida ay bulshada deegaanka u qabeen helidda xarun waxbarasho.
Raaxo Maxamed Axmed oo ka mid ah dadka deegaanka, isla markaana la hadashay Radio Muqdisho ayaa sheegtay in iminka ay heystaan goob waxbarsho, balse ay u baahanyihiin xarun caafimaad, waxaana ay dowladda ka codsatay in xarumo caafimaad laga hirgeliyo deegaanka Warjirow oo hoostaga degmada Balcad.
Guddoomiyaha Ururka SAAD Xasan Cumar Cismaan oo isna la hadlay Radio Muqdisho ayaa sheegay in u jeedka socdaalkooda ay la xiriirto sidii ay ugu kuurgeli lahaayeen xaaladda waxbarasho ee ardayda wax ka dhigata iskuulka, isagoo intaa ku daray in qorshahooda uu yahay inay gacan ka geystaan sidii ay gobollada dalka u gaarsiin lahaayeen xarumo waxbarasho.
