Guddoomiyaha Baarlamaanka Federaalka Soomaaliya Mudane Maxamed Sheekh Cusmaan “Jawaari” ayaa magaalada Muqdisho kulan kula qaatay Safiirrada dalalka carabta u fadhiya magaalada Muqdisho
Kulankan uu Guddoomiyaha Federaalka Soomaaliya la qaatay safiirrada dalalka carabta u fadhiyo magaalada Muqdisho oo ka dhacay xarunta Villa Hargeysa oo ay ku howlgallaan guddiyada iyo guddoonka Baarlamaanka ayaa waxa uu ku saabsanaa xaaladda dalka gaar ahaanna arimaha doorashooyinka la filayo in Soomaaliya ay ka dhacaan dhammaadka sanadkan 2016.
Guddoomiyaha Baarlamaanka Federaalka Soomaaliya Mudane Maxamed Sheekh Cusmaan “Jawaari” ayaa inta uu socday kulanka safiirrada dalalka Carbeed u jeediyey in dalalkooda ay Soomaaliya ka taageeraan dhinacyada geedi socodka Dastuurka, arrimaha dib u heshiisiinta iyo ammaanka dalka inta lagu jiro doorashooyinka.
Dhinaca kale Guddoomiyaha Baarlamaanka ayaa maanta magaalada Muqdisho kulan kula qaatay ergeyga xoghayaha guud ee QM u qaabilsan Soomaaliya Danjire Meykal Kiten oo isna uu kala hadlay xaaladda dalka.
