Mas’uuliyiinta wasaaradda warfaafinta dhaqanka iyo dalxiiska ayaa ka tacsiyeeysay geerida marxuun Sheekh Cumar Xuseen Xasan “Sh. Cumar Yare” oo ka tirsanaa waaxda warbaahinta ee wasaaradda warfaafinta, kaasoo xalay kooxo hubeysan ay ku dileen Muqdisho, xilli uu ka soo baxay Masjid uu ku soo Dukaday salaadda Taraawiixda.
Allaha u naxariistee Sheekh Cumar Xuseen Xasan ayaa maanta lagu aasay magaalada Muqdisho, isagoo ifka uga tagay xaas iyo wiil yar oo 11 bolood jira, wuxuuna Sheekhu casharro diini ah ka jeedin jiray Idaacadda Radio Muqdisho iyo Telefishinka Qaranka Soomaaliyeed.
Related posts
Agaasimaha Idaacadda Radio Muqdisho Mudane Axmed Faarax “Gaatamoow” ayaa tacsi tiiraanyo u leh u diray ehelada, qaraabada, iyo asxaabtii uu ka geeriyooday Sheekh Cumar Yare, isagoo ku tilmaamay in uu ahaa shaqsi magac iyo maamuus ku leh bulshada Soomaaliyeed.
Sidoo kale agaasimaha Telefishinka Qaranka Mudane C/naasir ayaa ka facsiyeeyay geerida Sheekh Cumar Yare isagoo u rajeeyay in Jannadii Fardowso Alle ka waraabiyo, wuxuuna ku tilmaamay shaqsi aad u qiimo badan oo ka baxay ummadda Soomaaliyeed.
Agaasimaha guud ee wasaaradda warfaafinta mudane C/risaaq Cali Yuusuf “Bahlaawi” ayaa isaguna ummadda Soomaaliyeed uga tacsiyeeyay geerida Allaha u naxariistee Sheekh Cumar Yare, wuxuuna si gaara ugu tacsiyeeyay qaraabada ehelada iyo asxaabta uu ka baxay Sheekh Cumar.
Allaha u naxariistee Sheekh Cumar Yere ayaa ahaa nin dhallinyaro ah oo leh akhlaaq wanaagsan, islamarkaana aad u bartay culuumta diinta Islaamka, wuxuuna si gaar ah Idaacadda iyo TV-ga iga jeedin jiray casharro la xiriira tarbiyada caruurta.
Innaa Lillaahi Wa Innaa Ileyhi Raajicuunย
