Hillary Clinton ayaa xalay si rasmi ah u aqbashay in ay noqoto musharraxa xisbiga Demoqraaddig u matali doona doorashada madaxtinnimo ee Mareykanka ee dhici doonta bisha November.
Waxa ay sheegtay in dalka Mareykanka uu yahay dal hadda lagu xisaabtamo, waxayna ku baaqday in la midoobo.
Waxa ay hadal ku dartay ninka ay is hayaan ee musharaxa xisbiga Jamhuuriga, Donald Trump, iyadoona ku tilmaantay in uu u maleeyo in dhibaatada dalka oo dhan keligii xallin karo.
” Nin ka caroonaya war lagu qoray twitter-ka, kuma aamini karno atoom bomb”, ayay tiri Ms. Hillary,
Waxa ay sheegtay in dadka Mareykanka oo si wada jir ah u shaqeeya ay mustaqbal wanaagsan u noqon karaa qofkasta.
Ms. Clinton ayaa u mahad-celisay taageerayaasheeda iiyo musharrixii ay ku tartameen doorashada hoose ee Dimuquraadiga, Bernie Sanders.
