Shirka Baarlamaanka Afrika oo maalmahan ka socday Magaalada Johannseburg ayna ka qeybgalayeen Xubno ka tirsan Xildhibaannada Afrika iyo Xoghayaasha Guud ee Barlamaanada, ayaa inta badan loogu doodaayay Heshiis dhawaan Dowladaha Afrika isla gaareen kaasoo ahaa in Wadamada hal baasaboor yeeshaan iyo inay xuduudaha intooda badan isku furaan. Waxaana Soomaaliya u matalayay Xoghayaha Baarlamaanka Federaalka Soomaaliya, Mudane C/kariim Xaaji Cabdi Buux.
Xoghayaha ayaa sheegay in shirkaan ay Soomaaliya uga qeyb qaadaneyso sidii ay qeyb uga ahaan laheyd heshiisyada iyo sharciyada guud ee Midowga Afrika isagoo intaa raaciyay in Soomaaliya ay waxbadan ka faa’ideysan karto.
“kulankaan xoghayayaashu waxay isku weydaarsanayaan sidii ay qeyb uga ahaan lahaayeen heshiisyada heerka caalami ah ee ay Dowladuhu kala saxiixdeen”ayuu yiri Mudane C/kariin Xaaji Cabdi Buux.
Dhanka kale waxaa Kulan laba maalmood socday oo ay yeesheen Xildhibaanada lagu falanqeeyay sidii loo yareeyn lahaa musaqmaasuqa Qaaradda ragaadiyay iyo shaqa la’aanta iyo gaajada Qaaradda ka jirta oo ay Afrika ku dadaasho sidii ay wax u soo saari lahayd shaqa abuur ugu sameyn laheyd Dhalinyarada.
Xildhibaan Cabdow Sakiye oo ka socday dalka Jabuuti kana qeybgalayay shirka,ayaa sheegay in Jabuuti ay aad ugu dadaaleen sidii ay uyareeyn lahaayd musuqmaasuqa.
Barlamaanka Afrika oo xaruntiisu tahay magaalada Johannsenburg ee dalka K/Afrika, ayaa sanadkiiba Afar jeer lagu qabtaa Shir ay yeeshaan Xildhibaano ka kooban Qaaradda waxaana Waddan walba u matala Shan Mudane iyadoo Soomaaliya ay xubin ka tahay Wadamadaas.
C/qaadir Axad,Johannseburg
