Wafdiga Xeer Ilaaliyaha Guud ee Qaranka Mudane Axmed Cali Daahir waxaa Madaarka Caasimadda Kuwait ku soo dhaweeyay Danjiraha Soomaaliya ee Kuwait Mudane Cabdulqaadir Amiin Sheekh iyo qaar kamid ah diblomaasiyiinta Safaaradda Soomaaliya ee Kuwait.
Xeer Ilaaliyaha Guud ee Qaranka ayaa lagu wadaa in uu kaqeybgalo munaasabad lagu soo gunaanadayo tababbar koox Xeer Ilaaliyeyaal Soomaaliyeed ah loogu soo xirayo Machadka Tababbarada Adeega Garsoorka ee Dalka Kuwait.
Sidoo kale, Xeer Ilaaliyaha Guud ee Qaranka Mudane Axmed Cali Daahir ayaa kulamo howleed la qaadan doono dhiggiisa Dalka Kuwait iyo Agaasimaha Guud ee Machadka Tababarada Adeega Garsoorka ee Kuwait, si loo joogteeyo tababbarada la siinayo howlwadeenada adeega garsoorka dalka.
Safiirka Soomaaliya ee Kuwait Danjire Cabdulqaadir Amiin Sheekh ayaa kaalin libaax ka qaatay xiriirinta iyo dhiraandhirinta barnaamijyada Iskaashiga ah ee Wasaaradda Caddaalada Kuwait ay u fidisay Garsoorka Soomaaliya.
Waxaa lagu wadaa in Safarka Xeer ilaaliyaha Guud ee Qaranka uu qaadan doono muddo sadex cisho ah, markaa kadibna uu dalka dib ugu soo noqon doono Soomaaliya.
