1- “Bashiir Cumar iyo Maryan Cumar garab i caawiyo ayey ii ahaayeen”
Muqdisho (SONNA) Aabe Cumar Xaaji Maxamed waxa uu Mehrad yar oo lagu iibiyo Bagaashka ku lahaa Isgooska Zoobe ee Magaaladda Muqdisho, Sagaal Caruur ah oo shan kamid ah ay Gabdho yihiin ayuu dhalay, Caruurtiisa kuwa waaweyn Wax ayey bartaan Dugsi sare iyo Jaamacado ayey kala dhigtaan, kuwa yaryar ka ahna Qur’aanka ayey bartaan, Nolosha Qoyskiisa iyo Kharashka Waxbarashada Caruurtiisa waxa uu ka dabari jiray Mehrada yar, Labo kamid ah caruurtiisa kuwa ugu weyn oo Wiil iyo Gabar ah ayuu ku waayey Qaraxii ka dhacay Maalin kahor Magaaladda Muqdisho, Dukaankii noloshooda ay ku tiirsaneydna gabi ahaanba wuu burburay.
Cumar Xaaji oo Lixaadkiisu uusan dhameystirneyn ayaa lagu wadaa Baaskiilka cuuriyaamiinta, isagoo inoo sheegay in Meydka caruurtiisa uusan helin, ayna ahaayeen kuwa markii ay kasoo baxaan Waxbarashada ka badala Dukaanka, si uu u nasto.
Waxa uu sheegay in Wiilkiisa Bashiir Cumar Xaaji uu dhigan jiray Iskuulka al Mazal ee Magaaladda Muqdisho, uuna u socday Imtixaanka dhexe ee Sanadka, waxaana uu tilmaamay in uu ahaa wiil aad u caawin jiray oo u dhago fufud, badanaana ka badali jiray iibinta Mehrada.
Wiilka Gabadha la dhimatay oo lagu Magacaabo Maryan Cumar Xaaji, ayuu sheegay in markii ay Iskuul la yiraahdo ALBILAAD oo ay dhigan jirtay kasoo baxdo ay Caano ku gadi jirtay Mehradiisa horteeda, si ay u kaabto Biilka qoyska oo aad danyar u ahaa.
Aabe Cumar Xaaji Maxamed oo Wareysi siiyey Warbaahinta Qaranka Soomaaliyeed, ayaa sheegay in ilmahiisa badankood ay yihiin Naafo lixaadkooda aan u dhameyn, waxaana uu xusay in Wiilka iyo Gabadha uu dhalay ee uga dhimatay Qaraxii Zoobe ay kamid ahaayeen Caruurtiisa kuwa Lixaadkooda uu dhameystiran yahay ee aan Naafadda aheyn, Garab caawinaad u ahaa ayuuna carabka ku dhuftay in ay u ahaayeen.
Dowladda Federaalka ah ee Soomaaliya ayuu ugu dambeyn Dhibane aabe Cumar Xaaji, ka codsaday in ay caawiyaan, ayna dib ugu abuuraan Ganacsi oo uu nolol maalmeedkiisa ka raadsado, maadaama Mehradiisii yareyd ay ku burburtay Qaraxii Isgooyska Zoobe ee Magaaladda Muqdisho ka dhacay.
2 “WAXAY II BALLAN QAADAY IN AY ISOO WACEYSO!”
Dhacdooyinka kale ee Xanuunka badan ee uu reebay Qaraxii argagixisinimo ee ka dhacay Sabtii lasoo dhaafay Magaaladda Muqdisho gaar ahaan Isgooyska Zoobe waxaa kamid ah Marxuumad Maryan Cabdullaahi Xuseen oo kamid aheyd dadkii ku dhintay Qaraxaasi.
Maryan waxay aheyd Arday bartay Kuliyadda Caafimaadka ee Jaamacadda Banaadir, qalin jabinteeda ayey isku diyaarineysay, Balse masuurta galin!
Markii Jaamacadda ay u dhamaatay, Waxaa Magaaladda London ee Dalka Ingiriiska kasoo ambabaxay oo Magaaladda Muqdisho kusoo wajahnaa Maryan aabaheed oo doonayey in uu ka qeyb galo Xafladda Qalin jabinteeda, si farxadda uu ula qeybsado, arrintaasi ma noqon mid rumoowda, Xaqiiqdiina waxay noqotay in uu kasoo qeyb galo duugteeda ama aaskeeda.
Riyadiisa waxaa beeniyey Maleeshiyada Kooxda Argagixisada ah ee Al-shabaab oo Qarax weyn si arxan darro wax ka yar Hal daqiiqo ugu Xusuuqay gabadhiisa iyo Dad kale oo aad u badan oo kor u dhaafaya 200 oo qof, kuwaasi oo Alle ha u Naxariistee aahaa kuwa aan waxba galabsan.
Anfac Cabdullaahi Xuseen oo ay wada dhasheyn Maryan oo aan la hadlay ayaa sheegtay in qoyskooda uu aad uga naxay Geerida Alle ha u naxariistee Dr Maryan oo ka shaqeeneysay Isbitaalka Banaadir ee Magaaladda Muqdisho.
“Qoyskeyga aad ayuu uga naxay, gaar ahaan aabbaheen oo ka soo safray London si uu uga qeybgalo qalinjabinteeda, balse hadda wuxuu ka qeybgalayaa aaskeeda”
“Waxay ka shaqeeyneysay Isbitaalka Banaadir , Qaraxa inta uusan dhicin waxyar 20 Daqiiqo kahor ayaa la hadlay, waxa ay ii sheegtay in ay sugeyso Feelal Isbitaalka yaallay, waxay ii ballan qaaday in ay i soo wici doonto” sidaas Anfac ayaa tiri.
Dhacdooyinkii ka dhashay Qaraxii 14 kii Bishaan Gelinkii dambe ee Maalintii sabtida aheyd Kooxda Nabad diidka ah ee Alshabaab ay ka geysteen Isgooyska Zoobe ee Magaaladda Muqdisho, ayaa noqday kuwa reebay Saameyn aad u xoog badan oo qalbiyada Ummadda Soomaaliyeed aan ka bixi doonin, waxaana Xasuuqan uu muujinayaa in Argagixisada ay usopo jeesatay dil wadareedka Shacabka aan waxba galabsan.
INAALILAAHI WA INAA ILEYHI RAAJICUUN
Dhacdooyin kale oo murugo leh oo ka dhashay Qaraxii Zoobe dhowaan kala soco Radiomuqdisho.net
W/Q:- C/raxmaan Maxamed Gacan
