Wasiirka Arrimaha dibada iyo iskaashiga Caalamiga ee Xukuumadda Soomaaliya Mudane Axmed Ciise Cawad oo gaaray magaalada Columbus Ohio ee dalka Mareykanka ayaa waxa uu booqday xarun cusub oo Columbus looga furay Telefishinka iyo Radiyaha Qaranka.
Booqashada Wasiirka ee xarunta ayaa waxaa ku wehliayay xubno ka tirsan Jaaliyadda Soomaaliyeed ee Columbus, iyaga oo markii ay halkaasi gaareen kula kulmay qaar kamid ah howlwadeenada Warbaahinta ee dalka Mareykanka.
Wasiirku waxa uu wax lagu farxo ku tilmaamay howsha la qabtay iyo sida loogu dhiiraday in si is xilqaan leh loo hirgaliyay xaruntan oo ah meel la galiyay waqti iyo dadaal badan.
“Howshii ay Wasaaradda Warfaafintu qaban lahayd Wasaaradda arrimaha dibaduna idinku garab siin ahayd ayaad si mutadawacnima ah u qabateen, waana wax lagu faano” ayuu yiri Wasiirka oo intaa ku daray in Qaranka oo waqti iyo hantiba loo huro ay qayb ka noqonayso soo celinta jiritaankeenii, waxana uu uu tusaale u soo qaatay mudadii ay wadeen howsha safaaradda Soomaaliya ku leedahay Washington DC in sidan oo kale dad iskood isku abaabulay ay safaaradda u adeegayeen kuwaas oo ilaa iminka u adeega sida Wasiirku xaqiijiyay.
Deeqo Shire (SONNA) oo ah shaqsiga lafdhabarka u ah howshan ayaa u mahadcelisay Wasiirka iyo xubnihii la socday, iyada oo ku tilmaamtay howshan in ay tahay mid ay Qaranka ugu adeegayaan isla markaana aysan cidna wax uga raadsanayn.
Deeqo ayaa xusatay in sanado badan Telefishinka Qaranka uu ka shaqeyayay Columbus laakiin hadda ay tahay xiligii ugu horeeysay oo xarun noocan ah loo furo, waxay tiri “Waxay noo tahay dhiirogalin iyo Niyad wanaag in Wasiirka Arrimaha dibadda uu nagu soo booqdo xaruntan, isla markaana uu nagu dhiirigeliyo howsha aan qabanay inaga oo aan wax sharuud ah u yeelin mudo ku dhow 7 sano”
Deeqo Shire (SONNA)
