Malleeshiyaadka Al-Shabaab ayaa isaga baxay degaannada Ceel-baxay,Goola-goole iyo Dudun-cad, oo dhanka Koofureed ka xiga Degmada Guri-Ceel ee Gobolka Galgaduud.
Dadka degaannadaasi ku dhaqan ayaa warbaahinta Qaranka u sheegay in ay arkeen Malleeshiyaadka oo halkaasi isaga guuraya, iyagoo u jiheystay dhanka Degmada Ceel-buur, markii ay lasoo gudboonaatay cabsi fara badan oo kaga timid Ciidanka xoogga Dalka Soomaaliyeed iyo kuwa maamulka Galmudug oo halkaasi ka wada howl-gallo ka dhan ah Kooxda nabad-diidka.
Dhowaan ayay ahayd markii uu Wasiirka amniga ee maamul goboleedka Galmudug, Saadaq Sheekh Yuusuf, sheegay in ay isugu yeereen Saraakiisha Ciidamada, si ay ugu diyaar garoobaan hol-gal ka dhan ah Al-Shabaab si loo xoreeyo degaannada ay Gobolka kaga sugan yihiin.
Waxaa sidoo kale soo dedejisay ka bixista Ururka Al-Shabaab degaannada ka tirsan Galgaduud, markii ay kordheen duqeynta xagga Cirka ah ee lagu bar-timaameedsanaya goobaha ay ku sugan yihiin, iyadoo Laba Cisho ka horna ay duqeyn xooggan ka dhacday Tuulada Dudun-cad oo ka mid ah meelaha ay haatan ka carareen argagixisadu.
