Wasiiro iyo Xildhibaanno ka tirsan Golayaasha Jamhuuriyadda Federaalka Soomaaliya oo maalmihii u danbeeyey ku sugnaa maamul goboleedka Puntland ayaa ka qayb galay shirka wada tashiga Puntland oo maanta ka furmay caasimadda maamul goboleedka Puntland.
Shirka waxaa sidoo kale ka qayb galay Madaxweynaha maamul goboleedka Puntland iyo golayaasha kala duwan ee Puntland, ururada bulshada, odayaasha dhaqanka iyo qaybaha kala duwan dadweynaha.
Madaxweynaha Puntland Siciid Cabdullaahi Deni ayaa martida shirka uga mahad celiyay sida wanaagsan ee ay uga soo aqbaleen shirka wuxuuna tilmaamay in shirkani uu salka hayo wada tashi iyo iskaashi.
Wasiirka Arrimaha dibadda Xukuumadda Federaalka Soomaaliya Axmed Ciise Cawad oo ka mid ahaa madaxdii shirka wax ka furay ayaa khudbad dhinacyo badan taabanaysa ka jeediyay shirkaas, isagoo caddeeyey in Dowladda ay ku faraxsan tahay shirkan wada tashiga ah, isla markaana ay salaam iyo bogaadin ka sidaan madaxda Qaranka Soomaaliya.
Shirka ayaa socon doona mudo saddex beri ah, waxaana maalinta u danbaysa laga soo saari doonaa war-murtiyeed si wada jir ah ay u diyaarin doonaan madaxda Dowladda Federaalka Soomaaliya iyo madaxda maamul goboleedka Puntland.
W/D: Zakariye Khaliif Faarax
