Waxaa maanta garoonka kubada cagta ee Eng. Yariisow Stadium ka furmay tartanka kubadda cagta ee degmooyinka Gobolka Banaadir 2020, kaasi oo sanadkaan markii ugu horeysay ay ka qeyb-galayaan Naadi ka socda Degmada Balcad.
Ku-simaha Guddoomiyaha Gobolka Banaadir ahna Guddoomiye Ku-xigeenka Maamulka iyo Maaliyadda Axmed Xasan Iimaan iyo Wasiirka Magacaaban ee Dhalinyarada iyo Isboortiga Xamsa Maxamed Xamsa ayaa si wadajir ah u furay, iyadoo ay ku wehliyeen Guddoomiye Ku-xigeenka Arrimaha Bulshada iyo Wacyigelinta Basma Caamir Axmed iyo Guddoomiye Ku-xigeenka Howlaha Guud Eng. Cumar Cali Cabdi.
Guddoomiyaha Isboortiga Gobolka Banaadir, Guddoomiye Ku-xigeenka Xiriirka Kubadda Cagta, Guddoomiyeyaasha Degmooyinka Gobolka Banaadir, Agaasimeyaal ka tirsan Dowladda Hoose ee Xamar, Cayaartooy hore, marti sharaf iyo qeybaha kala gedisan ee bulshada ayaa Garoonka ku sugnaa, waxaana Halkaasi Astaanka Calanka ku tumay Ciidanka DaambeeYda Booliska Soomaaliyeed.
Madaxda Gobolka Banaadir ayaa Naadiyada ka qeyb-galaya Tartanka u rajeeyay in ay cayaar wanaag soo bandhigaan inta uu socdo tartanka kubadda Cagta ee Degmooyinka Gobolka Banaadir.
Degmooyinka Dharkeynley iyo C/casiis ayaa lagu daah furay tartanka kubadda cagta ee degmooyinka, waxaana cayaarta oo ay u soo daawasho tegeen dadweyne aad u fara badan oo ka kala yimid degmooyinka Gobolka Banaadir waxa ay ku soo idlaatay Dharkeynley 0-1 C/casiis, waxaana goolka guusha cayaartooyda degmada C/casiis u suurta geliyay Idiris Maxamed, sidaas ayayna ku soo dhaamaatay cayaarta.
