Madaxweynaha dowlad goboleedka Galmudug mudane Axmed Cabdi Kaariye (Qoor-qoor) oo habka Foggaan aragga kaga qaybgalay Shirkii 5aad ee Madasha Iskaashiga Soomaaliya iyo Caalamka ayaa ka jeediyey khubad muhiim ah oo khusaysa dhinacyada badan oo ay ka mid-yahiin dib u heshiisiinta, Doorashooyinka iyo Amniga.
Madaxweyne Qoor-qoor ayaa tilmaamay in Madashaan muhiimad gaar ah u leedahay ummadda Soomaaliyeed isagoona ku booriyay dhamaan masuuliyiinta iney laban-laabaan dadaalka loogu jiro xoojinta midnimada, wadajirka, wada-tashiga,isku tanaasulka umadda Soomaaliyeed, si loo ilaaliyo mustaqbalka jiilka soo socda iyo sidii dhidibbada loogu aasi lahaa dowlad waarta.
Sidookale waxa uu sheegay in Galmudug qaadanayso kaalinta kaga aadan si loo yareeyo culeysyada doorashooyinka.
“Galmudug waxa ka go’an taabbagelinta heshiisyadii Dhuusamareeb (1,2,3) iyo dhameystirkii heshiiska oo lagu qabtay magaalada Muqdisho, Waxaan aaminsanahay in natiijada siyaasad xasiloon ay ka dhalan karto bulsho midaysan, walaalo ah, gacmaha is heysta oo ku dhaqmaya sharci iyo dastuur dameystiran ayuu yir”.
Madaxweyne Qoor-qoor ayaa timaamay in ay Galmudug diyaar u tahay in qeyb weyn ka qaadanto dib u dhiska dalka, xasilinta siyaasadda, sugidda amniga iyo horumarinta kaabayaasha dhaqaalaha dalka.
