Xoghayaha arrimaha dibadda Mareykanka Mike Pompeo ayaa maanta sheegay in hoyga cusub ee al-Qaacidda uu hadda yahay Iran, inkastoo uusan soo bandhigin wax caddeymo ah, eeddaas oo Iran si dhakhs badan u beenisay.
Pompeo ayaa xusay in al-Qaacidda xarunteeda dhexe ku taala Iran halkaas oo ay ku sugan yihiin horjooge Ayman al-Zawahiri iyo ku xigeenadiisa. Sheegasha xoghaye Pompeo waxaa shaki geliyo hey’adaha sirdoonka iyo qaar kamid ah xubnaha Congress-ka.
“Al-Qaacidda hoygeeda cusub waa jamhuuriyadda islaamiga ah ee Iran,” Pompeo ayaa hadalkan ka sheegay khudbad uu ka jeediyay naadiga saxaafadda qaranka (National Press Club) ee magaalada Washington.
Waxaa uu intaas ku daray in Iran ay noqon doono Afghanistanta cusub, maadaama buuraleyda wadankaas ay hadda ku dhuumaaleysanayaan al-Qaacidda.
Xoghayaha xilka ka degaya, ayaa beesha caalamka ugu baaqay in xukuumadda Tehran caddaadis la saaro inkastoo uu ka gaabsaday in uu ku baaqo talaabo militiri oo ka dhan ah Iran.
Wasiirka arrimaha dibadda Iran Maxamed Jawaad Zariif ayaa xoghaye Pompeo ku eedeeyay in uu sameeyay been abuur, qoraal uu soo dhigay Twitter ayuu ku dhaleeceeyay hadalka xoghayaha arrimaha dibadda Mareykanka.
Hadalka Pompeo waxaa uu u taagan yahay in Mareykanka awood ciidan u adeegsan karo Iran, maadaama uu jiro sharci soo baxay 2001 oo sheegaya in ciidanka Mareykanka howlgal ka sameyn karaan meel kasta oo al-Qaacidda lagu sheegay caalamka.
Sheegashada Pompeo waxay maamulka Trump u ogolaan kartaa in uu weeraro Iran isagoo aan wax ogolaansho ah uga baahneyn Congress-ka.
Hase ahaatee, congress-ka ayaa meel mariyay qaraar sheegaya in Trump uusan talaabo ka qaadi karin Iran ilaa uu ogolaansho ka heley golaha wakiilada ka dib dilkii Janaraalkii reer Iran ee Qaasim Suleymaani ee la dilay sanadkii hore ee 2020.
Trump sideed maalin ayaa uga hartay muddo xilkeedkiisa, khubarada waxaa ay ka walaacsan yihiin in madaxweyne xilka ka degaya uu qaadi karo talaabo aan laga fiirsan oo ka dhan ah Iran.
