Hay’adda GECPD oo kaashanaysa Wasaaradaha Haweenka, Caddaaladda, Arrimaha Gudaha iyo Gargaarka Galmudug ayaa maanta soo xirtay tababar saddax maalmood u socday laamaha Booliska iyo qaybaha kala duwan ee bulshada, Wuxuuna ku saabsanaa tababarkani qaabka ugu wanaagsan ee looga hortagi karo tacadiyada loo gaysto haweenka iyo carruurta iyo sida ay u heli lahaayeen xaquuqdooda.
Intii uu socday kulankan waxaa lagu falanqeeyay sida boolisku uga hortagi lahaayeen dhibaatada lagu sameeyo dadka barimageedada ah sida haweenka iyo caruurta, sidoo kalena waxaa looga dooday noocyada tacadi ee ka jira Galmudug iyo dadka ugu badan ee loo gaysto.
Xaliimo Axmed Kaariye oo ka mid ah dadka tababarkan ka faa’iideystay ayaa ka warantay sida tababarkan ay uga faa’iideysteen.
Safiyo Siigaale oo ka socotay Hay’adda bixisay dhaqaalihii ku baxay barnamijkaan ee GECPD ayaa uga mahadceliyay Wasaaraddaha kala duwan siday uga wada shaqeeyaan hoos u dhigida tacadiyadda, waxaana ay balan-qaaday inay sii balaarin doonaan kulamada noocaan oo kale ah.
Guddoomiye ku-xigeenka Amniga iyo siyaasadda Dhuusamareeb Cabdi Xaashi iyo Cumar Xasan Xaaji Agaasimaha guud ee Wasaaradda Gargaarka Galmudug ayaa sheegay in loo baahan yahay in lala shaqeeyo laamaha amniga si ay uga hortagaan Tacadiyada ka dhanka ah Jinsiga.
Wasiir Ku-xigeenka Arrimaha gudaha Galmudug Axmed Cismaan Aaden iyo Wasiir Dowlaha Caddaaladda Cali Cabdullaahi Galawax ayaa ugu dambeyn la dardaarmey xubnahan loo tababarey ka hortagidda tacadiyada ku dhaca haweenka iyo carruurta.
