Xaflad heerkeedu sareeyo oo ay soo qaban qaabisay Jaaliyadda Galmudug ee dalka Kenya oo lagu soo dhaweynayay Maayarka Magaalada Gaalkacyo mudane Cabdiraxmaan Sheekh Xasan sidoo kalana lagu taageerayay horumarka Degmada ayaa lagu qabtay Caasimadda Dalka Kenya ee Nairobi , waxaana ka qeyb galay Madax iyo qeybaha kala duwan ee bulshada, kuwaasi oo ay ka mid ahaayeen Xildhibaano, Guddoomiyihii hore ee Gobalka Mudug Axmed Bukhaari iyo Maayarkii hore ee Gaalkacyo ee Puntland, Salaadiin, culimo, ganacsato , haween iyo dhallinyaro.
Intii ay xafladdu socotay ayaa goobta lagu soo bandhigay Warbixin ka turjumaysa waxqabadka Maamulka Degmada Gaalkacyo intii uu xilka hayay Guddoomiye Cabdiraxmaan iyo hiigsiga Maamulka ee muddada ka harsan xil haynta Maamulka arintaas oo ay ka qeyb galayaashu aad usoo dhaweeyeen , isla goobtana ka balan qaadeen in ay intii karaankoodaa ka qeyb qaadan doonaan Mashaariicda horumarineed ee dhawaan laga hirgelinayo Gaalkacyo oo ay dhismaha waddooyinka halbowlaha ah ugu horeeyaan.
Mudane Cabdiraxmaan Sheekh Xasan Duqa Degmada Gaalkacyo oo ugu dambayn goobta ka hadlay ayaa u mahadceliyay Jaaliyadda reer Nairobi ee Galmudug oo kulankaan soo agaasintay isagoo ku dheeraaday ka hadalka horumarada kala duwan ee hadda ka socda Gaalkacyo , caqabadaha wali jira iyo hiigsiga wanaagsan ee Maamulku leeyahay, wuxuuna Jaaliyadda waydiistay taageeero dhan kastaa in ay ka geystaan Horumarinta Gaalkacyo.
