Safiiirka Soomaaliya ee dalka Kenya Danjire Jabril Ibraahim Cabdulle ayaa maanta xafiiskiisa ku soo dhaweeyay Ra’iisul Wasaarihii hore ee dalka mudane Maxamed Xuseen Rooble.
Soo dbaweyn kadib Danjire Jabriil iyo mudane Rooble ayaa waxa ay ka wada hadleen xaaladaha dalka, horumarka ay dowladda Federaalka ku talaabsatay, waxaana ay isla soo hadal qaadeen sida ay lagama maarmaanka u tahay xoojinta xiriirka diblomaasiyadeed ee Soomaaliya iyo Kenya.
Sidoo kale intii uu socday shirka ayuu Danjirihu waxa uu mudane Rooble warbixin ka siiyay sida Dowladda Kenya ay uga go’antahay in ay garab istaagto Go’aankii Dowladda Federaalka Soomaaliya ay ku burisay heshiis beenaadkii ka dhacay magaalada Adiss Ababa ee dhaxmaray Maamulka Soomaaliland ee qeybta ka ah Jamhuuriyadda Soomaaliya iyo Dowlada Itoobiya, kaas oo ahaa gardaro aan geed loogu soo gamban iyo faragalinta qaawan ee Dowladda Itoobiya ku heyso madax-banaanida iyo wadajirka dhuleed ee Jamhuuriyadda Soomaaliya, waxaana uu Safiirku xusay in Kenya ay ka mid ah dowladaha safka hore ku jira ee taageeray go’aankii dowladdu ay ku burisay heshiis beenaadka.
Ugu dambeyn ayaa Danjire Jabriil Ibraahim Cabdulle waxa uu Ra’isul Wasaarihii hore ee Soomaaliya Mudane Maxamed Xuseen Rooble ku soo wareejiyay qeybaha ay ka kooban tahay Xarunta Safaaradda Soomaaliya ee Dalkan Kenya iyo Guriga Martida loogu talagalay.
