Guddiga Beeraha, Horumarinta Reer-Miyiga, Xoolaha iyo Khayraadka Badda ayaa xarunta Villa Hargeysa maanta ku yeeshay Kulankoodii 4-aad kalfadhiga 4aad.
Kulanka oo uu shir guddoominayey guddoomiyaha guddiga Xildhibaan Mukhtaar Maxamed Guuleed, ayna goob joog ahaayeen qaar ka mid ah xubnaha guddiga ayaa waxaa dood iyo turxaan bixin lagu sameynayey Hindise Sharciyeedyada horyaala guddiga oo ay soo gudbisay Wasaaradda Beeraha iyo Waraabka XFS gaar ahaan Hindise Sharciyeedka Xakameynta Kiimikooyinka Beeraha Soomaaliyeed.
Guddoomiyaha guddiga oo u mahadcelinayey dhamaan xubnaha guddiga ayaa sheegay in dooda iyo turxaan bixinta Hindise sharciyeedka Xakameynta Kiimikooyinka Beeraha Soomaaliyeed ay sii socon doonto, dhowaana lasoo gebogebeyn doono si loo horgeeyo kulanka guud ee Golaha Shacabka.
