Wasiirka Warfaafinta, Dhaqanka iyo Dalxiiska ee Xukuumadda Federaalka Soomaaliya mudane Daauud Aweys Jaamaca ayaa soo xiray tababar ku saabsan ka hortagga wararka been abuurka ah kaasi oo lagu qabtay xarunta Safaaradda Turkiga ee Soomaaliya.
Siminaarkan oo ay iska kaashadeen Wasaaradda Warfaafinta iyo Safaaradda Turkiga ee Soomaaliya, ayaa waxaa ka qeybalay 21 suxufi oo ka kala socotay Warbaahinta Qaranka, Gobolka Banaadir iyo Warbaahinta sida gaarka ah loo leeyahay, waxaana ka qeybgalay qaar ka mid ah Agaasime-waaxeedyada Wasaaradda Warfaafinta.
Tababarkan oo socday muddo labo cisho ah ayaa waxaa bixinayay quburo ka socotay Wasaaradda Arrimaha dibadda ee Turkiga, kaasi oo ku saabsanaa ka hortagga wararka been abuurka ah iyo jiheynta afkaaraha bulshada, iyadoo sidoo kale ay ka qeybgaleen xubno ka socotay Waaxda Teknoloojiyadda ee Wasaaradda Arrimaha dibadda Soomaaliya.
Qaar ka mid ah ka qeygalayaasha siminaarka ayaa sheegay in ay wax badan ka faa’iideysteen, ayna diyaar u yihiin sidii ay bulshada ku heli lahayd warar sax ah.
Safiirka Turkiga ee Soomaaliya Danjire Alper Aktas oo madasha ka hadlay ayaa sheegay Soomaaliya ay ku talaabsatay horumar dhinacyo badan leh, ayna diyaar u yihiin garab istaaga dowladda iyo shacabka Soomaaliyeed.
Wasiirka Warfaafinta, Dhaqanka iyo Dalxiiska ee Xukuumadda Federaalka Soomaaliya mudane Daauud Aweys Jaamaca oo soo xiray tababarka, isla markaana u mahadceliyya madaxda Safaaradda Turkiga ee Soomaaliya ayaa tilmaamay in ujeedka siminaarka uu yahay sidii bulshada ay ku heli lahayd warar sax ah, isla markaana laga hortego wararka been abuurka ah.
Wasiir Daa’uud Aweys ayaa ka qeygalayaasha kula dardaarmay in aqoonta ay kororsadeen ay ku dabaqaan howlaha ay bulshada u hayaan, si shacabka ay u helaan warar sugan oo ka reeban been abuurka, Wasaaradduna ay door ka qaadaneyso siidii bulshada loogu jiheyn lahaa wararka horumarka ka turjumaya.
Ugu dambeyn ka qeybgalayaasha ayaa la guddoonsiiyay shahaado ka turjumeysa aqoonta ay kororsadeen.
