Guddoomiyaha Hay’adda Maareynta Musiibooyinka Qaranka Maxamuud Macallin Cabdulle, ayaa munaasabad kooban oo ka dhacday xarunta dhexe ee SoDMA waxa uu heshiis Istaraatiiji ah kula Saxiixday Guddoomiyaha Hay’adda Qatar Charity Xafiiskeda Soomaaliya Mudane. Cabdifitaax Aadan Macallin.
U jeedka heshiiskaan, ayaa ah in laga wada shaqeeyo ka soo kabashada dhibaatooyinkii ka dhashay musiibooyinka, u adkaysiga aafooyinka, xoojinta gargaarka bini’aadamnimo, tayeynta awoodaha shaqaalaha hay’adda SoDMA iyo in laga tageero helista keydad Gargaar oo ay hay’adda ka dhisanayso Dowlad Gobaleedyada.
Sidoo kale waxaa qeyb ka ah heshiiskaan in Qatar Charity ay hey’adda SoDMA ka saacido helitaanka Agabka gurmadka deg-deg ah, qalabaynta xarunta Qaran ee howlgallada iyo in wadajir la iskaga kaashado ka jawaabista xaaladaha ay sababeen Musiibooyinka, waxaana kulankaan goobjoog ka ahaa Guddoomiye ku xigeenka Hay’adda, Agaasimayaal iyo Mas’uuliyiin kale.
