Agaasimaha guud ee Wasaaradda Caafimaadka iyo daryeelka bulshada Xukuumadda Federaalka Soomaaliya Dr Guuleed Cabdijaliil ayaa soo xirey kulan looga hadlayey ansixinta Qorshaha Istiraatiijiyadeed ee Caafimaadka Taranka, Hooyada iyo Dhallaanka, ee 2023-2027 oo muddo sedax Cisho ah ka socday Magaalada Muqdisho.
Kulanka waxaa soo qaban qaabiseyย Wasaaradda Caafimaadka iyo daryeelka bulshada Xukuumadda Feferaalka Soomaaliye qeybteeda Caafimaadka Qoyska, waxaana kasoo qeybgaley Agaasimaal, xubno ka socday Wasaaradaha Caafimaadka Dowlad goboleedyada, Dhakhaatiir, maamulada Isbitaalada Dowliga iyo kuwa gaarka loo leeyahay Wakiilo ka socdey Hey’adaha Caalamiga ah ee taageera Caafimaadka Soomaaliya iyo marti sharaf kale.
Kulankan oo socday muddo sedax cisho ah waxaana lagu lafagurey xaqiijinta Istaraatiijiyadda Caafimaadka taranka Hooyada iyo dhallaanka taas oo ah mid muhim u ah bulsho waynta Soomaaliyeed iyadoo laga sii amba qaadayo geedigii horey usoo socday ee ay garwadeenka ka aheyd waaxda Caafimaadka qoyska ee Wasaaradda Caafimaadka iyo daryeelka bulshada Xukuumadda Federaalka Soomaaliya.
Intii uu socdey kulanka aqoon iswaydaarsiga ayaa lagu soo bandhigey daraasado iyo cilmi baarisyo kala duwan oo laga sameeyey taranka Hooyada iyo dhallaanka, iyadoo dhamaan daarsaduhu tilmaamayeen tallaabooyinka lagama maarmaanka u ah xaqiijinta Istaraatiijiyadda 2023 ilaa Sanadka 2027.
Kulanka ayaa sidoo kale lagu soo bandhigay qodobo waawayn oo qeyb ka ah gaarista yoolka cayiman ee ajandaha 2027 iyadoo loo marayo nuxurka kulanka ee ku qotama horumarinta Taranka Hooyada iyo dhallaanka taasoo qeyb ka ah xaqiijinta Caafimaadka qeybta qoyska guud ahaan Soomaaliya.
Wasaaradda Caafimaadka iyo daryeelka bulshada Xukuumadda Federaalka Soomaaliya waxaa ka go’an islamarkaana diradda u saaran kor u qaadida iyo dardargelinta tallaabooyinka lagu horumarinayo Caafimaadka qoyska iyo xaqijinta yoolka Xukuumadda ee Caafimaadka Dalkeena.
