Allaha u naxariistee Marxuum Wariye Sagal Salaad Cismaan oo ka mid ahayd suxufiyiinta Warbaahinta Qaranka oo shalay ay Muqdisho ku dileen dhagar qabayaal ka tirsan maleeshiyada AL-Shabaab, laguna aasay isbitaalka Madiina ayaa waxaa ka qeyb galay Wasiir ku-xigeenka Qorsheynta, Mas’uuliyiin ka tirsan Wasaaradda Warfaafinta, Ururka Suxufiyiinta Qaranka Soomaaliyeed ee NUSOJ, ehelada marxuumka, qaar ka mid ah ardayda Jaamacadda Plasma iyo suxufiin.
Maxamed Ibraahim Macalimuu Xoghayaha guud ee NUSOJ oo ka hadlay goobta aaska ayaa Alle uga baryay in uu janada ka waraabiyo, isagoo dowladda ka codsaday inay cadaaladda ka tiigsadaan dadkii falkaasi ka dambeeyay.
Afhayeenka maamulka gobolka Benaadir C/fataax Cumar Xalane oo ku hadlayay magaca caa’ilada marxuum Sagal ayaa sheegay in kan maamul ahaan ay dadaal u geli doonaan sidii gacan bir ah loogu qaban lahaa dadkii falka dilka ah geystay.
Agaasimaha Guud ee Wasaaradda Warfaafinta, dhaqanka iyo dalxiiska ee Xukuumadda Soomaaliya Mudane C/risaaq Cali Yuusuf Bahlaahi ayaa ugu horeyn ka tacsiyadeeyay falka lagu dilay Marxuum Sagal Salaad, isagoo hay’adaha ammaanka ka codsaday inay cadaaladda la tiigsadaan dadkii ka dambeeyay dilka Marxuun Sagal.
