Ardayda Soomaaliyeed ee dalka Uganda ayaa laga wacyi galinnayo halista cudurka COVID-19, xilli dalka Uganda mar kale cudurka kusoo laba kacleeyay.
Kulan wacyi galin ah oo ay soo abaabuleen Arurka Ardayda Soomaaliyeed ee dalka Uganda ayaa waxaa looga hadlay sidii ardayda uga feejignaan lahayd cudurkan karoonaha oo maalmahan fara adag ku haaya shacabka reer Uganda.
Drs. Caasho Cumar Axmed oo dhawaanahan booqasho ku joogtay dalka Uganda ayaa ardayda ugu digtay halisya cudurkan iyo sida looga feejignaan karo, maadaama goobaha ardayda yihiin meelaha ugu badan ee cudurkan ku faafay, dowladda Ugandana ay xirtay muddo 42 cisho ah.
Dhanka kale Guddoomiyaha ururka ardayda Soomaaliyeed ee Uganda Cabdimaajid Jaabir Salaad ayaa ugu mahadnaqay Diktooreyso Caasho sida ay ardayda ugu wacyi galisay xanuunkan.
Uganda ayaa cudurkan Karonaha kusoo laba kacleeyay, iyadoo dadkii xanuunka soo riday la la’ yahay isbitaallo lagula tacaalo caafimaadkooda.
Dowladda Uganda ayaa 42 cisho xirtay dhammaan goobahii waxbarashada, iyo isku socodka bulshada ee gobolada dalka iyo amarro kale, inkastoo wali laga digaayo in halista oo kusii faafa Uganda.
