Alle ha u Naxariistee waxaa Maanta Magaalada Muqdisho ku geeriyooday Wasiir Kuxigeenkii Wasaaradda Warfaafinta Dowlad Goboleedka Hir-Shabeelle kana mid ahaa Baarlamaanka Hir-Shabeelle Maxamed Axmed Faarax ( Kolombo)
Xildhibaano ka tirsan Baarlamaanka Hir-Shabeelle ayaa Risaala u xaqiijiyay geerida wasiiru dowlaha, iyaga oo sheegay in maalmihii la soo dhaafay uu xanuunsanaa sidaasina uu Maanta ku geeriyooday.
War-saxaafadeed kasoo baxay Xafiiska Guddoomiyaha Baarlamaanka dowlad Goboleedka Hir-Shabeelle oo loogu tacsiyadeeynayay Wasiirka geeriyooday ayaa waxaa lagu yiri”
“ Gudoomiyaha Baarlamanka Dowlad Goboleedka Hirshabelle Dr. Cabdixakim Luqmaan xaaji Muxumed isagoo ku Hadlaya Magaciisa, kan Guddoonka, iyo Magaca xildhibaanada Baarlamaanka Dowlad Goboledka Hirshabelle Waxuu ka Tacsiyadeynayaa Geerida Naxdinta leh ee ku timid Xildhibaan Marxuum Mohamed Ahmed Farah (Kolombo) oo kamid ahaa xubnaha ugu fir fircoon ee Barlamanka Dowlad Goboleedka Hirshabelle kaas oo ku geeriyoday Caasimada Soomaaliya ee Muqdisho.
Gudoomiye Cabdixakiim ayaa Yiri waxaan tacsida iyo tiiraanyada laqeybsanayaa Qoyska, Ehelka iyo Dhamaan Dowlad Goboleedka Hirshabelle Geeridii Naxdinta laheyd ee ku timid Marxuum Xildhibaan Mohamed Ahmed Farah (Kolombo) waxuuna Alle uga Baryey inuu Janatul Fardowsa Hoygiisa kadhigo Samir iyo Iimaana Ilaahay naga wada siiyo.
Dhawaan ayaa waxaa la filayaa in la’aaso meydka Alle Ha u naxariistee Wasiir dowlihii Wasaaradda Warfaafinta Dowlad Goboleedka Hir-Shabeelle kana mid ahaa Baarlamaanka Hir-Shabeelle Maxamed Axmed Faarax ( kolombo), waxaana ka qeyb geli doona mas’uuliyiin ka tirsan Maamulka Hir-Shabeelle.
