Wasiir ku xigeenka warfaafinta Soomaaliya, C/raxmaan Yuusuf Cumar, ayaa sheegay in dowladda Soomaaliya heshiis la gaartay wasiir Cabdirashiid Xasan Cabdinuur Janan, ka dib markii maanta wefdiga ka socda dowladda Soomaaliya gaareen gobolka Gedo.
“Wasiir Cabdirashiid Janan oo muhiim u ah nabadda gobolka Gedo ayaa heshiis la gaaray dowladda Soomaaliya… wuxuu ku yimid garasho uu wasiirku gartay in uu u hiiliyo qarannimada iyo dadaal ay bixisay dowladdu,” ayuu yiri wasiir ku xigeenka.
Sidoo kale, wasiir ku xigeenka warfaafinta waxaa uu intaas ku daray in wasiir Janan ay kula kulmeen duleedka degmada Beled-Xaawo ee gobolka Gedo isagoo wata ciidan badan kuwaas oo lagu biirin doono ciidanka qaranka.
“Talaabadan waa mid ka farxinaysa qofkasta oo jecel qarannimada Soomaaliyeed, waxayna ka nixinaysaa cidkasta oo caddaw ku ah qarankeena,” ayuu hadalkiisa ku soo gabagebeeyay.
Qeybo kamid ah gobolka Gedo maanta waxaa ka dhacay banaan bax lagu soo dhaweynayo heshiiska Cabdirashiid Janaan iyo xukuumadda Soomaaliya ay maanta ku gaareen isla gobolkaas.
