Ciidamada xoogga dalka iyo kuwa Galmudug oo howlgallo wada jir ah ka sameeyay koonfurta Gobolka Mudug ayaa ku guuleystay inay cagta mariyaan deegaanno dhowr ah oo ay argagixisada Al-Shabaab dadka ku dhibaateyn jireen, waxaana ay ciidamada gaareen magaalada Camaara.
Saraakiisha howlgalka hogaamineysa ayaa markii ay gaareen Camaara waxa ay goob fagaaro ah kula kulmeen dadweyne aad u fara badan, kuwaasi oo ay ka dhageysteen xaaladooda nololeed, isla markaana tilmaamay inay aad ugu faraxsanyihiin in laga dulqaaday cadowga Ummadda Soomaaliyeed ee Al-Shaabab oo dhibaato joogta ah ku hayay shacabka.
Ciidamada ayaa guulo la taaban karo ka soo hooyay howlgalladii ugu dambeeyay ee ay ka fuliyeen koonfur Gobolka Mudug, kuwaasi oo qorsheynaya inay u ruqaansadaan Degmada Xarardheere ee Gobolka Mudug.
