Howlgal ay ciidanka XDS oo gacan ka helaya kuwa AMISOM ka sameeyeen deegaanno hoos taga degmooyinka Xudur iyo Tiyeegloow oo ka wada tirsan gobolka Bakool ayaa ciidamadu ku dileen tiro ka tirsan maleeshiyaadka Shabaab halka ay qaar kalena nolosha ku qabteen, iyagoo ciidamadu ay si buuxda ula wareegeen deegaannadaasi.
Guddoomiyaha degmada Xudur Maxamed Macalin ayaa Radio Muqdisho u sheegay in dagaal ka dhacay Laba tuulo oo ka tirsan degmada Xudur ay ciidamadu ku dileen 16 ka mid ah maleeshiyaadka nabad diidka ah, isagoo xusay in ciidamadu ay si buuxda ula wareegeen tuulooyin farabadan oo ay ka mid yihiin Kulan Jareer Buurdhuxunle iyo kuwo kale.
Maxamed Macalin oo ah guddoomiyaha degmada Xudur ayaa intaasi ku daray in dagaal kale oo ka dhacay deegaanno hoos taga degmada Tiyeegloow ay ciidanku ku qabteen 11 ka tirsan malleeshiyaadka shabaab halka tiro intaa ka bandanna ay ciidamadu dileen.
Howlgalkan ka socda gobolka Bakool ayaa qeyb ka ah qorshayaasha la doonaya in kooxda UGUS looga sifeeyo dalkeena oo dhan.
