Ciidanka Xoogga Dalka Soomaaliyeed ayaa howlgallo ballaaran ka wada deegaanno hoostaga Degmada Balcad ee Gobolka Shabeelada Dhexe, iyagoo baadi goobaya maleeshiyaad ka tirsan Al-Shabaab oo shalay weerar ku soo qaaday Balcad.
Ciidanka Xoogga dalka ayaa Al-Shabaab ka saaray degmada Balcad, iyagoo gaarsiyay khasaare nafeed kana furtay hub ay wateen Al-Shabaab.
Dagaalkii shalay waxaa barbar socday iska hor imaad kale oo dhexmaray ciidamada AMISOM gaar ahaan kuwa Burundi iyo Al-Shabaab, kadib markii maleeshiyaadka Shabaab ay wadada u galeen kolonyo gaadiid ah oo ay wateen AMISOM.
Madaxweyne ku-xigeenka Dalka Burundi Gaston Sindimwo ayaa sheegay in 5 askari oo ka tirsan ciidamadooda ay ku geeriyootay weerarkaasi oo ay Al-Shabaab ku soo qaadeen Kolonyadii ay la socdeen, wuxuuna been abuur ku tilmaamay sheegashada Al-Shabaab tiro in taasi kabadan oo ay nolol ahaan u qabteen.
Xaaladda degmada Balcad iyo deegaanada hoostaga ayaa degan, waxaana socda howlgallo ay wadaan Ciidanka Xoogga Dalka Soomaaliyeed, maamulka degamada ayaa lagu wadaa in dhawaan uu la hadlo Warbaahinta,sida uu soo sheegayo Wariyeheena Maxamed Amiin Yabarow.
