Ururka Daaliban ayaa bayaan ay soo saareen ku sheegay inay dileen 13 ka mid ah ciidmada dowladda Afghanistan, sidokalana ay qafaasheen 22 kale, inkasta oo sheegashadoodu ay badanaa noqoto tiro aan sax aheyn.
Saraakiisha Afghanistan ayaa dhankooda xaqiijiyay inDaalibaan ay dileen sagaal ka tirsan ciidamada amniga, isla markaana ay af-duubteen 13 xubnood oo kale, kaddib weerar ay ku soo qaadeen gobolka Herat ee kuyaal xadka ay la wadagaan Iiraan.
Guddoomiyaha gobolka Herat Sayed Wahid Qatali ayaa sheegay in Daalibaan ay bartilmaameedsadeen laba saldhig oo ay ku sugnaayeen ciidamada ammaanka, kuwaas oo ku yaal degmooyinka Koshan iyo Ghorian.
Weerarkan ayaa ku soo aadaya xilli ay socoto qaban-qaabada shir uu Mareykanku soo jeediyay oo dabayaaqada bishan lagu qaban doono magaalada Istanbul ee waddanka Turkey, si loo dardar galiyo qorshaha nabadda ee u dhexeeya Daalibaan iyo dowladda Afghanistan.
