Iyadoo roobab daadad watay oo socado badan ay ka da’een qaybo badan oo ka mid ah gobolka Hiiraan dadkuna ay ku diirsadeen ayaa waxaa uu roobkaasi saamayn ku yeeshay qoysas aad u faro badan kaddid markii xalay saqdii dhexe ay daadad soo rogmaday ay guryahooda ugu galeen.
Qoysaskan ayaa waxaa ay degeen hareeraha laamiga magaalada Beledweyne halka kuwa kalana ay aadeen duleedka magalada si ay hoy ugu samaystaan halkaasi.
Qaar kamid ah dadkan oo la hadlay Radio Muqdisho ayaa sheegay daadadku ugu soo galeen guryahoodi sidaana ay uga soo barakaceen iyagoo codsaday in lala soo gaaray gurmad bani’aaddanimo.
“Alle mahaddii waaye roob ayaa xalay inoo da’ay lakiin anaga saamayn waxa inagu yeeshay daa’dadkii oo xalay guryaha biyo noogu soo galeen, haddana waa inoo jeeddaa meesha aan daggan nahay, in naloo so gurmadaan u baahanahay” ayuu yiri oday da’ ah oo ka mid ah dadkaasi danyarta ah.
Keliga buundo 2-aad ayaa waxaa uu wadaa biyo aad u badan waxayna biyahaasi uu inta badan saameeyaan xaafadda laabka oo ka mid ah degmada Beledweyne.
Daadadkii ka dhashay roobka ayaa sidoo kale bur bur u gaystay waddada laamiga ah ee isku xirta gudaha magaalada iyo Jento Kundisha kadib markii ay biyaha dul mareen.
Ibrahim Muxumad Geeddi Beledweyne
