Shir looga hadlayay doorashooyinka lagu wado inay Soomaaliya ka dhacaan bilaha soo socda oo uu qabtay Mahcadka baarista ee Human Sciences Research Council,ayaa lagu qabtay magaalada Pretoria ee K/Afrika.
Kulankaasi waxaa ka qeybgalay Wafdi ka socda Soomaaliya oo uu ka mid yahay Xildhibaan Faarax Sh C/qaadir, Danjiraha Soomaaliya u fadhiya Dalalka Afrikada Koonfureed, Jamal Barrow, Qunsulka Safaaradda,Mudane Maxamed Cali Mire (Nabaddoon) xubno matalayay Jaaliyadda Soomaaliyeed qeybaheeda kala duwan, Xubno ka socay Wasaaradda Arimaha Dibadda K/Afrika iyo Aqoonyihanno K/Afrikan ah.
Shirkaan oo ay qudbado ka jeediyeen Xildhibaan Faarax C/qaadir iyo Danjire Jamal Barrow waxay ka hadleen xaaladaha Dalka Soomaaliya iyo in doorasho kuwii hore ka duwan lagu wado in Soomaaliya ka dhacdo, waxa ayna labada Mas”uul qudbaddooda ka sheegeen in Soomaaliya ay ka soo kabanayso burburkii iyo Dowlad la’aantii mudadada badnayd jirtay.
Danjire Jamal Barrow ayaa qudbadiisa ku sheegay in Dowladda Soomaaliya ay ku shaqeyso shan tiir oo ay muhimadda kowaad labaad iyo sedexaad siiso amaanka ayna hadda ka duwantahay sanadihii hore sida ay ahayd.
“ Labaatan Sanno kaddib Soomaaliya hadda waxa ay dib u yeelatay Bandhgi dhexe kaasoo u shaqeeeya sida Bangiyada Caalamiga ah, dhinaca kale waxaa Soomaaliya dib ugu soo laabtay Qurba joogtii ugu badneyd kuwaasoo doonaya inay ka qeyb qaataan dib u dhiska Dalka”ayuu yiri Danjuruhu.
Xildhibaan Farax Sh C/qaadir oo ka mid ahaa Wafdiga ugu qeybgalaya Shirkaan loogu hadlayo doorashooyinka Soomaaliya oo qudbad ka jeediyay waxa uu sheegay in Dowladahii hore ee KMG ahaa lagu soo dooran jiray meelo ka baxsan Soomaaliya balse hada horumar badan laga sameeyay oo ay doorashada ka dhici doonta inta badan Maamul Goboleed Soomaaliya iyo Caasimadda intuba.
“ Waxaan wadnaa Waddadii lagu gaari lahaa Sanadka 2020-ka in loo codeeyo qof iyo codkiisa balse caqabadaha inaga heysta doorashooyinka ayaa ah inay dadka aqoon durugsan u laheeyn doorashada, doorashadii hore ee 2012 ka waxaa soo doortay 275 xildhibaan balse hadda waxaan wadnaa in illaa 14000 qofood ay doorasho samayeen,waana wax ku duyasho mudan” ayuu yiri Xildhibaanku.
Shirkaan waxa uu sidoo kale ka dhici doonaa Magaalooyinka Cape Town iyo Durban ee K/Afrika iyadoo si weyn loogu faaqidi doono arimaha doorashooyinka.
C/qaadir Axad, Pretoria
