Wafdi uu hogaaminayay wasiirka arrimaha gudaha dowlad-goboleedka Hirshabeelle Maxamed Cali Caadle, oo ay ka mid ahaayeen gudoomiyaha gobolka Sh/Dhexe Axmed Meyrre Makaraan, xildhibaan Shiiraar iyo guddi ka kooban odayaal dhaqameed oo maaalmahan degmada Cadale u joogay howlo ay ku nabadeeynayaan beelo walaalo ah oo hore ugu dagaallamay deegaanka Burdheere oo hoosyimaada degmada Cadale ayaa maanta ku guuleystay iney nabadda qaadato mid ka mid ah labadaas beelood oo hore u diiday iney soo gasho gogosha wadahadalka.
Dadaallo dheeraad ah oo wasiir Caadle iyo gudoomiye Makaraan ay ku bixiyeen taabba gelinta wadahadalladaasi ayaa ugu dambeyntii miro dhal noqday kaddib markii ay maanta soo galliintay beeshii qaaddacday wadahadalka iyadoo akhyaarta samaddoonnada ah ee hoggaamiya beeshaasi ay qireen in ay si shuruud la’aan ah u qaataan wadahadalka, waxeyna beeshu soo xirtay naf Geel ah oo xaalmarin ah sidoo kalena barbaarta gaashaaman ayaa halkaasi ku soo bandhigay ciyaarta shirbka.
Gudoomiyaha gobolka Shabeellaha Dhexe Axmed Myrre Makaraan oo halkaasi ka hadlay ayaa soo dhaweeyay go’aanka beeshaasi ay ku qaadatay wadahadalka iyo galliinka ay u soo xireen madaxda iyo odayaasha dhaqanka.
“Walaalayaal aadbaan ugu faraxsanahay go’aankiina taariikhiga ah waana fileynay inaad nabadda qaadandoontaan, waa inaad fahamtaan qiimaha nabadda oo aad ka fogaataan dilka dadka abriyada ah een waxba galabsan taas bedelkeedana ad usoo jeesataan horumarinta nolosha deegaanadiina” ayuu yiri gudoomiyaha gobolka Sh/Dhexe Axmed Meyrre Makaraan.
Wasiirka arrimaha gudaha arrimaqha gudaha ee Hirshabeelle Maxamed Cali Caadle oo shirkaasi soo gabagabeeyay ayaa aad ugu mahadcelshay go’aanka beesha, wuxuuna ku dheeraaday ka hadalka ahmiyadda ay bulshadu u leedahay, isagoo amaanay labada dhinacba sida ay u qaateen nabadda, wuxuuna ku wargeliyay ergada labada dhinac in berri 9-ka aroornimo uu dib u furmayo wajiga labaad ee shirkii maalmo ka hor ka furmay deegaanka Burdheere.
By: Mowliid Maxamed Sabriye Cadale
