Saraakiil Katirsan ciidanka booliska Soomaaliyeed oo uu tababar ciidan muddo hal sano ah uga socda dalka Ugandha ayaa maanta loo soo gabagabeeyay.
Xafladda xiritaanka tababarka waxaa ka qeybgalay Madaxweynaha dalka Ugandha Yuweri Musafeni, Taliyaha Ciidanka Booliska Soomaaliyeed Sareeye Gaas Maxamed Sh Xasan Xaamud, Saraakiil ciidan oo ka kala socday dalalka Soomaaliya, Uganda, iyo Koofurta Suudaan.
Taliyaha Ciidanka Booliska Soomaaliyeed Gen. maxamed Shekh Xasan Xamud oo la hadlay Wakaaladda Wararka Soomaaliyeed ee SONNA ayaa sheegay in saraakiishaan oo ah Leyli Sarkaal uu u dhammaaday tababar ciidan oo muddo hal sano qaatay, maantana loo soo xiray.
“Sharaf weyn ayay ii tahay in aan ka soo qeybgalo xafaladda saraakiisha booliska ah ee uu mudada halka sana ah dalkan tababarka uga socday, waxay tababar la qaadanayeen askar kale oo ka socday dalka Koofurta Suudaan, Madaxweynaha Ugandha iyo marti sharaf kale ayaa ka soo qeybgalay xafladda xiritaanka, dhawaan ayay dalka dib ugu laaban doonaan iyagoo Aqoon iyo waaya aragnimo kororsaday” ayuu yiri Gen Xaamud.
Taliyaha ciidanka booliska Soomaaliyeed Sareye Guud Maxamed Sh Xasan Xaamud, ayaa isbadal ballaaran oo la taaban karo ku soo kordhiyay Ciidanka booliska, tan iyo wixii ka dambeeyay markii madaxweynaha Soomaaliya Mudane Xasan Sh Maxamuud uu u magacaabay Xafiiska ugu sarreeya ee taliska Ciidanka Booliska Soomaaliyeed.
