Waxaa todobaadkan ka dhacay gobolka Minnesota ee dalka Maraykanka xaflad balaaaran oo ay Jaaliyada Galmudug ee gobolkaasi ku taageeraysay hay’ada hormarinta ee GOB oo gacanta ku haysa dhismaha wadada iskuxirta caasimada gobolka Mudug ee Gaalkacyo iyo magaalada Hobyo.
Gudoomiye ku xigeenka hay’adaasi Mudane Maxamed Axmed urur oo munaasibadaasi lagu soo dhaweeyay ayaa warbixin dheer ka bixiyay baahida keentay dhismaha wadada, heererkii ay soo martay iyo waxtarka weyn ee ay u leedahay guud ahaan Soomaalida gaar ahaana dadka gobolada dhexe.
Mudane Urur ayaa sheegay in dadka deegaanka iyo qurbajoogta Soomaaliyeed gaar ahaan kuwa Galmudug ay muruq, maal iyo maskaxba galiyeen sidii wadadaa muhiimka ah loo dhisi lahaa isgaoo intaa ku sii daray in uu dhismuhu meel wanaagsan marayo dadka ka qaybqaatayna ay heleen kalsooni ah in ay baahidooda wax ka qaban karaan intii ay cid kale sugi lahaayeen.
Gudoomiye ku xigeenka ayaa ugu danbayntii kula dardaarmay dadweynihii munaasabada ka soo qaybgalay in ay sii wadaan taakulaynta mashruucan oo uu soo dhawaaday waqtigii ay mirihiisu soo go’ayeen waxaana uu si weyn ugu mahadceliyay jaaliyada Galmudug ee Minnesota oo qaybweyn ka qaadatay dhismaha wadadan.
Dadkii kale ee shirkaa ka hadlay waxaa ka mid ahaa Ugaas Yuusuf Xasan Warsame, Sh. Cabdullaahi Faraweyne iyo Sh. Cabdi Calibahal oo soo jeediyay hadalo iskugu jiray wacdi iyo dhiiragalin oo ay si weyn ugu riyaaqeen ka soo qaybgalayaashi xafladu. Ugu danbeystii waxaa goobta laga dhwaaqay balaqaad lacageed oo ay jaaliyadu mashruuca ugu deeqday.
