Danjire Jabriil Ibraahim Cabdulle Danjiraha Dowladda Soomaaliya ee dalka Kenya iyo xubno ka tirsan diblomaasiyiinta Safaraadda Soomaaliye ee magaalada Nairobi ayaa ka qeybgalay bandhig dhaqan oo lagu soo badhigay Jaamacadda Caalamiga ah ee Maraykanka – Afrika, ee marka la soo gaabiyo loo yaqaano USIU-Africa.
Jaamacadaan oo ka mid ah Jaamacadaha ugu waaweyn ee dalka Kenya iyo guud ahaan Qaaradda Afrika ayaa waxa wax ku barata arday badan oo Soomaali ah, kuwaas oo Jaamacadda ka-barta kuliyadaha kala duwan ee Jaamacadda laga dhigo.
Ardeyda Soomaaliyeed ee Jaamacadda dhigata ayaa waxa ay halkaas ku soo bandhigeen dhaqanka faca-weyn ee qoomiyadda Soomaalida. Ardeyda ayaa iyaga oo kalsooni iyo farxad ka muuqata waxa ay dadka ka soo qeybgalay bandhiga u soo bandhigeen heeso iyo barnaamijyo ka tarjumaya dadka Soomaalida.
Ardeyda ayaa aad ugu faraxday ka soo qeyb-galka ay Madaxda Safaaradda Soomaaliya, oo uu hogaaminayo Danjire Jabriil kala soo qaybgashay bandhigga iyo garab istaag ay Safaaradda u sameeysay ardeyda waqtiga badan galisay inay soo bandhigaan kuna faanaan dhaqanka iyo taariikhda dadka Soomalida.
Danjire Jabriil Ibraahim Cabdulle oo lagu martiqaaday inuu la hadlo ardeyda, macalimiinta iyo marti-sharafta ka soo qeybgashay bandhiga ayaa ku amaanay hogaanka Jaamacadda qabashada bandhigaan.
Danjirte Jabril ayaa yiri “Maanta, ma aha inaan ka qayb galnay bandhig dhaqan kaliya, basle waxaynu markhaati ka nahay muujinta quruxda badan ee midnimada, walaaltinimada, iyo dareenka iskaashiga caalamiga ah ee ardeyada jaamacada wada dhigata”
Danjiraha ayaa waxa uu intaas ku daray “Dunidan oo ay inta badan kala qaybsanaantu ku badan tahay, bandhigaan waxa uu xasuusin xooggan u yahay in isku aragtida iyo isku dareenkeena ama aanu wada-wadaago inuu aad uga weyn yihiin kala duwanaashaha ina kala fogeeya. Dhaqan kasta, caado kasta, luqad kasta oo maanta halkan lagu matalayo ama lagu soo bandhigayo waxay markaati ka tahay sida aanu isugu dhaw-nahay”.
