Danjiraha Soomaaliya u fadhiya dalka Kenya isla markaana ah wakiilka Joogta ah ee UNON, UNEP & UN-Habitat, Mudane Jabriil Ibraahim Cabdulle ayaa loo doortay in uu noqdo Guddoomiyaha Wakiilada Joogtada ah ee dalalka Afrika (Africa Group) ee fadhigoodu yahay magaalada Nairobi.
Danjire Jabriil Ibraahim Cabdulle iyo howlwadeenada Safaaradda Soomaaliya ayaa hogaamin doona qorsho hoowleedka wadamada ku bahoobay Africa Group. Safaaradda Soomaaliya ee magaalada Nairobi ayaa gogol fadhi u noqon doonta kooxda Afrika.
Safiirka Soomaaliya ee dalka Kenya Danjire Jabriil Ibraahim Cabdulle ayaa aad uga mahadceliyay Afrika Group kalsoonida ay u muujiyeen dalka Soomaaliya, gaar ahaan hoggaanka Safaaradda Soomaaliya. Danjiraha ayaana balan qaaday in uu si buuxda ula shaqeyn doono wakiilada dalalka Afrika.
