Gaashaandhiga Maraykanka ayaa qiray khaladkii duqeyntii Isbitaalka Kunduz ee Maraykanka (Pentagon) ayaa markii ugu horeysay qirtay khaladka dhankooda ee duqeyntii diyaradahooda la beegsadeen isbitaalka MSF ee magaalada Kunduz ee waqooyiga dalka Afghanistan.
Duqeyntaasi oo dhacday 3dii bishii hore ee Oktoober ayey ku dhinteen 30 qof oo ay ku jiraan 13 ka tirsan dhakhaatiirta aan xaduuda lahayn ee MSF iyo dad badan oo isbitaalkaasi jiifay oo ay ku jiraan caruur. Maraykanka ayaa warbixin uu soo saaray ku sheegay in xogta goobtaasi ku duqeeyeen ay ka heleen Sirdoonka Afghanistaan oo xiligaasi la dagaalamayey kooxda Talibanka oo qabsatay wakhtigaasi magaalada Kunduz, isla markaana diyaaradooda ay damacsaneyd inay duqeyso xarun Talibanka ku sugnaa, warbixintan ayaa lagu sheegay in qalabka diyaarada saarnaa ee lagu cabiro jihada uu kharaabay taasna khasabtay in duuliyaha uu isagu ishiisa ku cabiro goobta uu duqeenayey halkaasi oo uu khalad ka yimid, sida uu sheegay Pentagonka. Waxaa la sheegay in shaqo joojin iyo tilaabooyin laga qaaday xubnihii militariga Maraykanka ee duqeyntaasi ku lug lahaa. Hase yeeshee hay’ada MSF oo horey u codsatay in baaritaan caalami ah lagu sameeyo duqeyntaasi ayaa ku tilmaamay hadalka kasoo baxay Pentagonka mid aysan ku qanceyn, isla markaana loo baahan yahay guddi caalami ah oo madax banaan uu baaro xasuuqa ka dhacay Isbitaalkaasi Kunduz. Guddiga ka socda Qaramada Midoobay ayaa horey u sheegay in duqeyntii Kunduz ay u muuqato inay u dhiganto danbi dagaal. Dowlada Maraykanka oo iyadu aan inta badan maxkamad soo taagin askarteeda danbiyada dagaalka ayaa diidan in guddi madax banaan uu baaro isbitaalka la duqeeyey balse sheegeen inay ay taasi ku filan tahay baaritaanka uu militarigooda sameeyey.
