Kulan looga hadlayay sidii dhisme casri ah loogu bilaabi lahaa Dekadda Hobyo ee gobolka Mudug ayaa maanta lagu qabtay magaalada Cadaado kaasi oo ay ka qeyb galeen Wasiiro, Xildhibaanno iyo mas’uuliyiin kale oo ka tirsan dawlad goboleedka Galmudug.
Kulanka ayaa yimid markii quburo ka socotay shirkad dhismaha ka shaqeeya oo fadhigoodu yahay dalka Shiinaha oo todobaadkan ku sugnaa deegaanada Dawlad goboleedka Galmudug, isla markaana kormeeray Dekada qadiimiga ah ee Hobyo, dhismaha wadooyinka Cadaado iyo Gaalkacyo laga bilaabay ee la doonayo in Hobyo la geeyo, kuwaasi oo dib ugu laabtay Cadaado.
Shirka ayaa waxaa warbixino looga dhageysayay xubno la socday quburada ajaaniibta ah, kuwaasi macluumaadkii kormeerka lagu soo aruuriyay la wadaagayay mas’uuliyiinta kale, iyagoo rajo wanaagsan ka muujiyay in mashaariicdaasi sahanka loo samaynayo lagu guulaysto.
Khuwan Ju oo madax u ah shirkadda sahanka samaynaysay ayaa sheegay in macluumaadka ay soo ogaadeen uu muujinayo kalsooni lagu howlgali karo.
Wasiir ku-xigeenka howlaha guud ee dawlad goboleedka Galmudug Axmed Ilkacase ayaa sheegay in ay xoogga saarayaan sidii loo abuuri lahaa ilo dhaqaale oo maamulka iyo bulshaduba ka faa’iideysato.
Galmudug ayaa dadaal ugu jirta dhismaha Dekada degmada Hobyo ee gobolka Mudug, taas oo loo arko inay noqon karto isha dhaqaalaha ugu muhiimsan ee deegaanka.
