Ugu yaraan sagaal qof ayaa ku dhintay 37 kalena way ku dhaawacmeen kaddib markii uu dhulgariir ka dhacay gobolka Van ee daklka Turkiga Axada maanta ah sida ay sheegtay wasaaradda caafimaadka ee dalkaas.
Sagaal ka mid ah dadka dhaawacmay ayaa ku jira xaalad halis ah, sida la sheegay.
Wasiirka Arimaha Gudaha ee dalkaas Suleyman Soylu ayaa sheegay in seddex kamid ah dadka dhintay ay ahaayeen carruur, isagoo intaa ku daray in guryo gaaraya 1,066 ay burbureen.
Hay’adda Maareynta Musiibooyinka ee dalkaas ayaa durba bilowday howlo lagu soo badbaadinayo dadka.
“Dadaallada baadi doonka iyo badbaadinta dadka ayaa socda,” ayuu yiri wasiir Soylu.
Dhulgariirkan oo cabirkiisa uu ahaa 5.7 qiyaasta dhulgariirada ayaa ku dhuftay xudduuda Turkiga iyo Iran.
Warbaahinta Dowladda ee loo yaqaan ‘TRT ayaa sheegtay ina dhulgariirka uu saameyey illaa 43 tuulo oo ku yaal dalka Turkiga, kuwaasoo ay horey uga dhaceen dhulgariiro xoog leh.
Waxaa turjuntay: Aamina Ladan Axmed Cali
