Kumanaan dadweyne ah oo u badnaa culuma’udiin iyo ardayda dugsiyada waxbarashada ayaa maanta isugu soo baxay wadooyinka magaalada galkacyo kuwaasoo ujeedka dibad baxooda uu ahaa mid ay ugu dabaaldagayeen maamusida bishii iyo maalintii uu dhashay nabigeeni Muxumad (NNKH).
Bulshadii ka qeyb gashay dibadbaxaan ayaa socod dheer kusoo maray wadooyinka magaalada galkacyo qaarkood iyagoo qaadayay qasiidooyin nabi amaan ah iyo saliga Nabigeenii Maxamed (NNKH).
Qaar ka mida culum’udiinkii ka qeybgalay banaan baxaan oo iyagu qudbado kasoo jeediyay fagaaraha weyn ee Sheekh Axmed Sheekh Yuusuf Jimcaale (Sheekh Ilka Dahab) oo ay kusoo gaba gabeeyeen dibadbaxooda ayaa ka sheekeeyay fadaa”isha ay leedahay weeynaynta maalintii iyo bishii uu dhashay Nabigeenii nabadgalyo iyo naxariisi korkiisa ha ahaatee.
Gudoomiyaha Maxkamada sare ee dowlad gobaleedka Galmudug Sheekh Axmed Sheekh Yuusuf Jimcaale (Sheekh Ilka Dahab) oo isna ka hadlay madasha lagu soo gunaanaday dibadbaxaan loogu dabaaldagayay dhalashada nabigeeni Muxamed (NNKH) ayaa qudbad dheer oo uu halkaasi ka jeediyay kaga hadlay arimo farabadan oo ay ka mid ahayeen colaadaha ka jira.
Gobolada dalka soomaaliya dhibaatooyinka jidgooyooyinka iyo in lagu xadgudbo dhaqanka suuban ee diinta islaamka Sheekh ilka dahab ayaa ugu horeeyn sheegay in colaadaha ka jira Gobalada dalka soomaaliya intooda badani ay yihiin kuwo salka ku haya xuduudaha maadaama dalka ay ka jiraan maamulo kala duwan taasoo uu tilmaamay in qofkasta oo muwaadin soomaaliyeed ah looga baahan yahay in uu ka qeyb qaato xal u helideeda.
Sheekha ayaa sidoo kale mar uu ka hadlaya jidgooyooyinka ay maleeshiyaadka aan cidna ka amar qaadan ay dhigtaan qaar ka mida deegaanada Galmudug ayaa sheegay in aan wax horumar iyo kheyr ah aysan gaareeyn bulshada ku nool deegaanada ay ku sugan yihiin kooxaha qowleysatada ah ee mar kasta utaagan dhibaateeynta shacabka soomaaliyeed,isagoona xusay in loo baahanyahay in dagaal lala galo,islamarkaana meel looga soo wado soo jeesto.
Ugu danbeeyna waxaa soo xiray xafladaaan lagu soo gabagabeeynayay dibadbax loogu dabaal-dagayay dhalashada nabigeenii Muxamed (NNKH) madaxdii maamulka galmudug ee ka qeybgalay munaasabada kuwaasi oo ay ka mid ahaayeen Duqa dagmada Galkacyo Bile Diini Cali Gudoomiyaha Gobalka Mudug Aweys Cali Saciid iyo wasiirka wasaarada dib u heshiinta
iyo arimaha fadaraalka Galmudug Mudane Xasan Faarax Barre dhamaantoodna waxeey si isku mid ah ugu mahadceliyeen culuma’udiinkii Ahlu sunnah ee soo agaasimay dibadbaxaan lagu maamuusayay dhalashada Nabigeenii Muxamed (NNKH).
Mahad celin kadibna Mas’uuliyiinta ayaa sheegay in ay bishaani tahay mid ka mida bilaha qiimaha ku leh dadka muslimiinta ah maadaama ay tahay bishii uu dhashay nabigii iyo rasuulkii ugu danbeeyay ee rabbi subxaana wataacaalaa uu koonkaan usoo saaro.
Dibadbaxaan oo ahaa kii ugu balaarnaa ee loogu dabaaldagayo dhalashada nabigeenii Muxamed (NNKH) ayaa kusoo idlaaday si nabad galya ah.
C/risaaq Maxamed Axmed Xafiiska warbaahinta Qaranka Gobolka Mudug.
